British heavyweight boxer lar Anthony Joshua chuan WBC champion Tyson Fury-a team in ring chhunga an inhmachhawn theihna tura inremna an zawrh chu an pawm a. December 3-ah ‘all-British heavyweight fight’ nei turin an inpeih a, chhanna an nghak tih a team in an sawi.
Kum 32 mi Joshua hi Fury-a team hian inremna hi zawrhin ‘fight purse’ atanga an sum hmuh tur chu Fury-a’n 60% chang a, Joshua hian 40% chang turin an rawt a, December an tinzawn bawk.
Joshua management company chuan Zirtawpni khan inremna hi an nei a, mahse Britain lalnu Queen Elizabeth II a thih avangin an la puangzar lo niin an sawi.
Thuphungin inremna hi an nei tawh a, Joshua hian contract erawh a la sign lo.
Social media kaltlangin he inremna hi puan a ni a, “Anthony Joshua aiawhin 258MGT leh Matchroom Boxing te chuan an inhmachhawnna tura Fury-a team ten inremna min zawrh zawng zawng chu kan pawm.” tiin an sawi chiang.
Kum 34 mi Fury hian April thla khan Dillian Whyte a hneh hnuah boxing a chawlhsan tur thu a lo sawi tawh a. Thla hmasa khan a chawlh thu a sawi nawn leh.
Nimahsela world champion hlui Joshua hi social media kaltlangin a cho leh a. Joshua hian thla hmasa khan Oleksandr Usyk chu hneh lo nawn lehin ring chhung a luh hnuhnung panga atangin vawi thum a tlawm tawh.
December thla a inhnek hi an puitlin theih dawn chuan a hmun tur erawh tihfel a la ni lova. Joshua hi a chak a nih chuan ‘rematch clause’ awmin hemi tumah erawh fight purse hi 50-50 a ni tawh ang.