Netflix kutchhuak royal dram lar, ‘The Crown’ chu Queen Elizabeth II thih hnu-ah en a hlawh lehzual sauh.
Peter Morgan siam UK Lal thlah te chanchin tarlanna hmuhnawm tak hi 2016 khan tihchhuah tan niin, Lalnu thih hnu khan darkar maktaduai 17.75 view hlawhin, top ten-ah rang takin a lut nghal.
Season pahnih hmasa ah khan Claire Foy chu Queen lemah changin Emmy award pahnih a dawng nghe nghe a, season pali dang erawh Oscar winner Olivia Colman a inlan thung. Season hnih dang hi Imelda Staunton-in kutah a tlulut dawn thung.
Tarlan tawh angin, Queen Elizabeth II hi September 8 khan Balmoral Castle-ah a boral a. Hemi ni zing lamah hian doctor te chu a hriselna chungchangah an ngaih a tha tawh lo hle a, uluk takin an vil zui nghe nghe.
Lalnu hi kum 70 zet ro relin, Britain chanchina Lal rei ber nihna a chelh.
Kum 1952 khan a pa George VI thih hnu-ah Lalnu a ni nghal.
Kum rei tak ro a rel laiin Queen hian khawvela thil thleng langsar leh pawimawh tak tak a tawng chho a, kum zabi 20-na chanve a hmang pha a, kum zabi 21-a kum 20 velzet a hmang liam thei bawk.
‘The Crown’ hian Lal chhungkaw chanchin a tarlang chiang hle a, khawvel hmasawn chak tak kara an insiamrem dan te pawh hmuh tur a awm.
He series hian fak a hlawh a; production design, writing, direction leh performance chungchangah pawh sawi leh sel tur a vang hle. Critics lam pawhin an dah chungnung hle bawk.
Queen Elizabeth II a awm tawh lo takah chuan a fapa Prince Charles-a’n King Charles III hmingpu in rorelna fawng a chelh zui dawn a ni.