Tottenham Hotspur in huntawp dawn hun pekbelhah goal hnih an chhuah a. UEFA Champions League-ah Sporting Lisbon lakah 2-0 in an tlawm.
Thawhlehni zanah London club hi Estádio José Alvalade-ah an inkhel a. Minute 90 chhung beisei an phak loh hnuah Sporting substitute pahnih Paulinho leh Arthur Gomes ten goal an khung a. Tun season ah a vawikhatna atan Spurs an tlawm.
Spurs hian goal hlauhawm mumal tak insiam an harsat thin a, awmze nei a ball an inpek kual thin ang chu tun tumah an ti thei thin lo.
Lehlamah Sporting Lisbon in an club chanchin a vawikhatna atan UEFA Champions League a an group match hmasa pahnihah hnehna an chang.
Spurs coach Antonio Conte chuan, “Inkhelah kan inthlau lova, second half-ah chak kan tum avangin kan result a lungawithlak loh hle. Mahse a tawp minute 10 chhung erawh kha aia tha khan kan khel thei chiang. Inkhel awlsam a ni lo.” tiin an tlawm hnuah a sawi.
Group D inkhel dangah French club Marseille tan knockout stage luh inbeiseina a kiam leh sawt a. 1-0 in German club Eintracht Frankfurt an hneh lo.
Europa League champion Eintracht tan Jesper Lindstrom chuan goal a khung.