Indian Prime Minister Narendra Modi chuan Chinese hruaitu, Xi Jinping leh Russian President Vladimir Putin te chu venhimna lam sawihova intawhkhawmna turah an inhmu dawn a, an inhmuhkhawmna tur hi khawthlang ramte an tangrual ang bawka khawchhak lam ramte tanrualna pawl a ni.
Shanghai Cooperation Organisation (SCO) tia an sawiah hian Pakistan, Iran, Turkey leh Asia khawmualpui ram lailia mite an tel a, Uzbekistan-ah Ningani leh Zirtawpni hian an inhmukhawm dawn.
Tun tum intawhkhawmah hian Ukraine indona kal mek leh China leh khawthlang ram inkar thilte chu an sawiho tur langsar a nih ngei a rinawm.
Modi-a tel tur hian ngaihven a tihlawh zual a, Russian leh Chinese hruaitute nen an inkawm ngei rin a ni.
India hi SCO-ah hian dinhmun danglam deuh takin a awm a. SCO-a a telpui ram tam takte nena inhnimhnai hlei thei lo ram – US, Japan leh Australia te nen Quad an tih ram tangrualah a tel tho bawk a ni.
Quad member ni ve tho mah se Russia-in Ukraine a rûn mekah demna lam thu a sawi duh lo va, Moscow atangin tuialhthei a lei chhunzawm zel zawk.
Modi-a hian intawhkhawmnaah hian a hranpain ram dang hruaitute a kawm ngei rin a ni a, sorkar erawh chuan hemi chungchang hi sawi a la nei lo.
Tun tuma SCO summit a tel tur hi kum 2020-a ramria China nena an intihbuai hnua hmaichhana Xi-a nena an inhmuh vawi khatna tur a nih avangin ngaihven a hlawh phah a. Himalaya tlangdunga an intihbuainaah khan India chuan a sipai 20 chânin China hian a hnu feah sipai pali an hloh ve tih a sawi bawk.
Ram pahnihte hian an inrem lohna lai hrang hrang zinga thawm nei lian ber chin fel tumin inbiak vawi lina an nei zo deuh chiah nia sawi a awm bawk.
Modi-a hian hun rei tak ata tawh India nena inep reng, Pakistani Prime Minister Shehbaz Sharif-a a kawm dawn em tih ngaihven mek a ni bawk a, Sharif-a hi April thla atanga prime minister ni tan a ni.
Nuclear ralthuam nei ram pahnihte hi an inmil lohna a rei tawh hle a, SCO-ah ngei pawh lo inbakkaih tawh an ni.
September, 2020-a SCO ram member-a national security advisor-te intawhkhawm tumin Pakistan hian an ram map-ah India rama state zinga mi a huamtir avangin India aiawha tel chu meeting-a tel zui duh lovin a lo haw tawh a ni.
Kum 2019-a India-in danpui hmanga Kashmir hung bikna a hlipa union territory pahniha a then hnuah khan an inkar a chhe zual a, helai hmun hi Pakistan pawhin an ram anga a chhal ve tho a ni.
Hetih laia Pakistan prime minister, Imran Khan chuan India nena insumdawn tawnna pawh a titawp nghal vek a ni.
Uzbekistan-a intawhkhawm atang hian an boruak a ziaawm theih beiseina a awm mek a, Pakistan prime minister hnuaiah hian an inhnaih theih deuh rinna a awm.
April khan Pakistani foreign minister chuan India nena insumdawn tawnna kalpui leh tum a nih thu a lo sawi tawh a, Pakistan chu ‘ram dang laka inlakhranpuiin ram dang nena inrem lohna a thlensak’ niin a sawi a, sorkar hmasa a dem.
Mi thiam thenkhat chuan India hian Pakistan nen hian summit-ah hian thil dang dang bakah firfiak dona kawnga tanrualna lam sawipui a tum niin an sawi a. Delhi hian India-a firfiak pawlte pui thinah Islamabad hi a puh tawh thin a, Pakistan erawh chuan nasa takin a pha thung.