MNF Legislature Party Secretary L Thangmawia’n, “Congress party-in Zoram mipui hnenah thu belhchian dawl lo an thehdarh,” a ti.
L Thangmawia chuan nimin khan Aizawl Press Club-ah thuthar thehdarhtute kawmin he thu hi a sawi a. Inrinnia MPCC media department-in press statement an tihchhuaha ni 1.4.2019 atanga ni 14.7.2022 inkara contractor-te bill Rs. nuai 100 chung lam chin, Mizorama treasury pakuaten an pekchhuah dan RTI hmanga an dil thu an tar lana bill 736 pek chhuah zingah bill 103 chauh thlang chhuakin sorkar chu contractor duhsak bik nei anga lantir an tum niin a sawi.
MNF legislature party secretary chuan, “MPCC media department hian contractor za chuang bill pekte zingah an duhzawng paruk chauh thlang chhuakin an bill lak dan an thlurbing zui a, hei hi mipui rilru dik lo taka hruai kawi tumna a ni,” a ti.
L Thangmawia chuan finance department-in RTI hmanga zawhna an chhannaa bill Rs. nuai 100 chuang, ni 1.4.2019 leh 14.7.2022 inkara treasury pakuain an pek chhuah atangin bill thehluh ni la laa pek chhuah 105 zingah MPCC media deptt-in duhsak bik nia an sawi contractor parukte bill chu 10 vel chauh a nih thu leh an tar lan ve loh, a ni la laa pek chhuah ve tho bill dang 90 chuang a nih thu a sawi.
MPCC-in contractor pakhat chu ni thum chhunga bill pahnih release-sak a nih avanga duhsakna dawng anga a hming nen lam an tar lan laiin, ni thum chhunga bill release-sak bill dang 100 a awm thu a sawi a. Contractor pakhat bill panga, Rs. vbc 9.92 chawlhkar khat chhunga release-sak vek a nih avanga MPCC-in duhsak bik huanga an khung laiin, chawlhkar khat chhunga bill tihfel 168 zet a nih thu L Thangmawia chuan a sawi.
L Thangmawia chuan, “Bill thehluh ni la laa Rs. nuai 100 chuang bill pass nghal belhkhawm Rs. 5,91,19,69,734 a nih laiin MPCC-in duhsak bik nia an tar lan contractor parukte bill, a ni la laa release nia an tar lan belhkhawm chu Rs 25,85,40,000 a ni a, hei hi a ni la laa bill pass zinga 4.3% chauh a nih thu a sawi.
Kar khat chhunga treasury-in bill a release Rs 6,91,28,50,316 a nih laiin MPCC-in a bik taka duhsak nia an tar lan contractor parukte bill chawlhkar khata pek chhuah zat nia an sawi chu Rs 9,92,00,000 a ni a, duhsak riau bika an sawite chan chu 1.43% chauh a nih thu leh an sawi tel loh 98.57%, Rs 6,81,36,50,316 a nih thu a sawi.
MNF legislature party secretary chuan MPCC media deptt-in press statement bakah ‘MNF sorkar duhsak zawng contractor-te tan a vur kum’ tih phek hnih an tihchhuaha Siaha Treasury-a bill hrang hrang belhkhawm Rs 30,75,17,337 nia an tar lan pawh a dik loh thu leh Rs 30,53,78,959 a nih thu a sawi bawk.
MPCC-in duhsakna dawng nia an sawite bill chu contractor dangte bill aiin a tlem hle a, a inthlauhna Rs 32,65,87,41,423 lai a nih thu L Thangmawia chuan a sawi a. Bill chhuak zawng zawng atanga MPCC-in duhsakna dawng nia an sawi contractor parukte chan chu 1.93% chauh a nih thu leh an sawi lan tel loh contractor dangte chan 98.06% a nih thu sawiin, MPCC thuchhuak chu hre reng chunga mipui rilru dik lo taka hruai luih tumna a ni tih loh theih a nih loh thu a sawi bawk.