Sorkarin dan hnuaia grape wine siam leh zawrh phalna a tihchhuah hma atangin Champhai Grape Grower Society (CGGS)-in Tlangsam Winery-a dah turin grape rah thahnem tak an lei a, nimin khan kumin atana a hnuhnung ber turin an lei leh a; kumina an lei zawng zawng chu Rs nuai 67 chuang man a ni.
CGGS hian kumin bikah July 13 atang khan wine siamna tur grape rah an lei tan a, kg-ah Rs 60 zelin an lei a ni.
Nimin khan kumin atana a hnuhnung ber turin quintal khat bawr vel an lei leh thu CGGS hruaituten The Zozam Times an hrilh.
CGGS-in grape wine siamna tura kumin atana grape rah an lei zawng zawng chu quintal 1,127.81 a ni a, Rs 67,66,860 man a ni a, kumin chhunga grape rah hralh hnem ber chu HS Lalfakzuala niin, quital 116.86, Rs 7,10,167 man a hralh.
CGGS-ah hian grape huan nei chhungkaw 113 an awm mek a, kumin bikah hian chhungkaw 79-ten an thar chhuah chu winery-a sawr turin an hralh a ni.
Mizoram sorkarin dan hnuaia grape siam leh hralh phalna, Grape Wine Rules a siam chu sial talha lawm turin nimina CGGS executive committee thukhawm chuan an rel a, October 12, 2022-ah lawm an tum a ni.