Lunglei District Congress committee (LDCC)-in Baptist Church of Mizoram (BCM) sum Rs nuai 26 chhehrelhsakah Education Minister Lalchhandama Ralte an puh a, tun thla chhung ngeia pe let tur leh bâng turin an phut.
LDCC thuchhuahin a tar lan danin Mizoram sorkarin NABARD loan hmanga school eng emaw zat a saknaah thil fel lo tam tak a awm nia media hrang hranga tar lan a nih hnuah Baptist Higher Secondary School (BHSS) Administrative building, Lunglei Serkawna sak mekah Rs nuai 26 chu a bo ve leh a. Hemi chungchangah hian Education Minister Lalchhandama Ralte chu mawhphurtuah an ngai.
LDCC chuan, “Congress sorkar lai khan sikul sak that tur zingah BHSS hi telh niin, Rs nuai 80 ruahman ni mah se, MNF sorkar tharah Rs nuai 78-ah tihhniam a ni a, a sak hna pawh contractor hnenah pek a ni,” an ti.
BCM hotute chuan contractor kutah pek a nih chuan tha vak lova sak an hlauh avangin kohhran kutah dah mai turin education minister chu ngen mah se a hlawhtling lo niin an sawi.
Education minister-in sum siam a tum avangin Allied Consultancy firm hming hawhin, party worker/contractor hnenah Rs nuai 52-a sa turin an ti niin LDCC chuan an sawi a. “Rs nuai 26 chu an chheprelh ta tihna a ni,” tiin, contractor-in Rs nuai 15 hauhin, BHSS Administrative building chu Rs nuai 37 hmanga BCM-in a sak turin BCM kuta hlan an tum a, hei hi BCM chuan an hnawl niin an sawi bawk.
BCM-in Rs nuai 37 hmanga sa tura tihna an hnawl hnu hian minister leh a naute chuan Rs 42,46,088-in BCM chu sa mai tur leh an rawih chhawn party worker/contractor pawh earth work senso pe turin an ti leh niin LDCC thuchhuah chuan a tar lang a. Tihngaihna dang a awm tak loh avangin BCM chuan building sak hna chu a kovah dahin, sorkar sumin a daih bak chu kohhran suma chhunzawm mai an tum ta niin an tarlang.
BHSS Administrative building tur chu September, 2021 tawp lam atang khan BCM chuan sa tanin, hna tam zawk zawh tawh a nih thu LDCC thuchhuah chuan a tar lang bawk a ni.