Aizawl : Kolasib Bawrhsap John LT Sanga’n nimin khan School of Nursing, Thingdawl (SONT) a tlawh a. Nursing zirlaite nen inkawmin, Nursing hna chu inpekna thuk tak ngai a nih thu leh midangte tana malsawmna ni tura thiamna bik neih a pawimawh thu a sawi.
Nursing zirlaite chu mihring hriselna enkawltu leh damlo enkawltu an nih dawn avangin thiamna bakah dawhthei leh rintlak an nih a țul bik thu a sawi a. Modern nursing tihhmasawn kawnga sulsutu Florence Nightingale chanchina entawn tur tam tak sawiin, “mahni mihringpuite nunna leh hriselna thleibik nei lova, theiht- awpa enkawl a pawimawh” a ti a. “Kan hna theuhte țha taka kan thawh bakah min mamawhtute chunga kan chetzia leh țawngkam hman dan hian an taksa leh rilruah damna nasa tak a thlen phah thei a ni” a ti bawk.
Result nei țha țhin SONT chu Kolasib dist tihmingțhatu a nih mek thu Bawrhsap chuan a sawi a. Zirna a tihțhat piahlamah hna an thawh huna midangte tana malsawmna ni tura thiamna hmantlak an neih a pawimawh thu a sawi.
SONT hi Mizoram sorkar hnuaia GNM school pahnihna niin, Dec ni 11, 2017 ah tan a ni a. Mi 37-in zirchhuak tawhin, zirlai 61 an awm mek. Kum 2021-a Nursing Council Exam, 3rd year final-a top ten zinga pakhatna, pathumna, palina, parukna leh sawmna te chu he school-a zirlaite an ni.