Chinese sorkar aiawha Queen Elizabeth II ruang en leh zahna hlan chu khap a ni.
UK House of Commons Speaker Sir Lindsay Hoyle chuan China-in MP panga leh peer pahnih a hrek mek chhan let nan Westminster Hall-a lalnu thlahna an hman phalsak an ni ve lo tih a sawi.
Queen Elizabeth hi Thawhtanni thleng mipuiin thlahna hnuhnung atan an hmuh theih nan a kuang hi dah mek a ni.
Speaker pisa chuan venhimna lam thu-ah hlauhthawn a awm vang em ni tia BBC a zawhna chu an chhang lo.
Chinese foreign ministry thupuangtu chuan an sorkar aiawhte tlawh ve tur phalsak lo anga sawi an hriat ve loh thu an sawi a, phal loh nia sawi hi Politico website atanga darh a ni.
China foreign ministry thupuangtu, Mao Ning chuan, “A thlengtu a nih angin UK hian inpalai tawn dan kal pangngai leh mikhual dawnsawn dan pangngai a kalpui tur a ni,” a ti.
Nikum khan China hian Uighur Muslim-te an tih dan a dik lo nia puhtu British mi pakua chu an rama zin leh an ram chhunga an thil neih khawih chet a phalsak lo va, heng mite zingah hian parliamentarian pasarih lai an tel nghe nghe.
Hei vang hian UK-in an ram parliament-a China ram palai luh pawh a lo phalsak lo tawh a, tunah Queen Elizabeth thlah duh an ram aiawhtute pawh an tel a phalsak lo leh ta a ni.
UK-China inkar hi tun hnaiah a tha vak lo va, tuna hrekna pawh hian nghawng a nei lian zel thei.
Hetih lai hian Thawhtannia vuina inkhawmah chuan China vice-president tel tura beisei a ni.
Parliamentary rule book an tih, kum 1965-a siam, Erskine May-ah chuan Queen Elizabeth II-in Westminster Hall a thununna chu Lord Great Chamberlain nen an intawm niin he dinhmun luahtu hi lal, Commons leh Lords rorelna ina speaker ve vete ruat thin a ni.
Nikum September khan Sir Lindsay leh Lords Speaker Lord McFall te chuan China ram palai chu Beijing-in hrekna a kalpui avangin Parliament-a a luh an phalsak lo tih an hrilh.
Hetih hun lai hian Chinese sorkar chuan UK thiltih dan chu demin dawihzepthlak a tih thu a sawi.
Ningani khan Beijing-in a hrek MP leh peer inthurualte chuan Foreign Secretary hnenah Queen vuinaa tel tura President Xi Jinping-a sawmna chu hnuk kir leh turin an lo ngen tawh bawk a. An zingah hian Tory minister thin pahnih, Iain Duncan Smith leh Tim Loughton pawh an tel a ni.
UK chauh ni lo, khawthlang ram tam takin Muslim Uighur-te laka China chet dan a dik lo an tih avangin Chinese mi pawimawhte an hrek nasa.
China hian an ram hmarthlang, Xinjiang velah Uighur-te hi manin an khung khawm a, nasa taka sawisain hna an thawh luihtir a, mipat hmeichhiatna lamah pawh an hmang nasa hle nia sawi a ni.
China erawh chuan hetianga khawthlang ramten chea an puhna hi nasa takin a pha thung.
President Xi-a chu Queen vuinaa tel tura ram hruaitu sawm zingah a tel a; mahse, amah tak a tel hmel loh.
British thuneitute chuan a aiah Vice President Wang Qishan a tel dawn niin an sawi.
Downing Street thupuangtu chuan UK nena inkungkaihna nei ram hruaitute chu vuinaah hian sawm an ni hlawm tih a sawi.