Aizawl: Bible Society of India (BSI) Executive Committe-in tun hnaia Madhya Pradesh Police-in sum leh pai hman dik loh kaihhnawiha an man, BSI President Most Rev Dr PC Singh-a chu BSI-a a mawhphurhna zawng zawng hlihsak a nih thu BSI Aizawl Auxiliary Secretary a hriattir.
BSI Aizawl Auxiliary Secretary hnena lehkha an thawnah hian September 15, 2022-a BSI Executive Committe thukhawm rorel tar lan a ni a, tun hnaia Madhya Pradesh sorkar hnuaia Economic Offences Wing (EOW)-in a chenna in an dapa police-ten an man tak, Most Rev Dr Singh chu BSI hmai tibaltu a nih avangin BSI kaihhnawih thil reng renga a dinhmun, a nihna leh mawhphurhna zawng zawng hlihsak vek an rel thu leh BSI vice president, Dr Leelavathi Vemuri chu acting president atan ruat nghal a nih thu an tar lang.
BSI Executive Committe-in thuchhuah an siamah chuan BSI leh Most Rev Dr Singh-a inkarah hian sum lut leh chhuak engmah a awm lo va, president a nihna ang hian BSI hminga sum chungchanga thutlukna siam thei a nih loh bakah ama thua sum theihna engmah a nei lo tih a sawi a ni.