Zaithiam lar Beyonce hming chu Guinness World Records Hall of Fame-ah a lang chho zut zut ta. A chhuanawm hle.
Record thar ropui tam tak zingah, ‘Number one dinhmunah Studio album hmasa paruk dah thei’ tih te, ‘Hmeichhe zaithiam zinga kumkhata sum lalut hnem ber’ tih te a tel.
Tihian a tawp mai lo. Beyonce hi Guinness list-a ‘Hmeichhe musician zinga Twitter (retweets) nasat ber’ nihna a chelh bakah a pasal Jay Z nen, ‘Hollywood-a nupa sum lalut hnem ber’ nihna an chelh zui bawk.
Heti anga em ema mal khai anga world record ropui tak tak chhawmlut nghal thei hi an tam lo hle a, Guinness World Records Hall of Fame-ah hian a chungnung hle a ni.
NAUPANG MAH SE…
Billie Eilish pawh hi 2023 edition tharah hian vawi hnih ngawt a hming nemkai niin, ‘Most consecutive Grammy nominations for Record of the Year (Female)’ leh ‘Youngest person to win the tripple Crown of film muisic awards’ ah tu chuh phak rual lovin a lawr chhuak.
Ani hi James Bond track, ‘No Time To Die’ ah khan kum 20 mi lek niin Oscar, Golden Globe leh Grammy a lo hum hawh tawh.
BEYONCE A THEU NEU LO,
A NAMAI LO
Beyonce chuan rimawi khawvelah mel lung pawimawh a phun ta a, a album pasarihna, ‘Renaissance’ hmangin Billboard Hot R&B/Hip-Hop chart-a top hla 10 nei thei hmeichhe palina a ni.
Billboard tarlan danin, 1958 kum atanga chart mummal tak an kalpui hnu khan heti ang dinhmun thleng thei hmeichhia pathum chiah an la awm.
Aretha Franklin chuan kum 63 a nih khan pahnih a nei a, 1967 – 1985 inkar khan hla 20 a nei. Janet Jackson-‘n hla 16 hmangin a zui a, Mariay Carey pawhin hla 10 nen dinhmun tha tak luahin Beyonce nen an dinhmun a inang ta chiah.
Beyonce hlawhtlinna ropui tak hi ‘Renaissance’ album atanga single hmasa ber, ‘Break My Soul’ in bul a tan a, tunkar Hot R&B/Hip-Hop chart-ah number one a ni. Karhmasa khan Number four ni mah se, album streaming a chak em vangin a lawr chho ta zawt zawt a ni ber.
Thla hmasa khan ‘Renaissance’ hi US-ah vawi maktaduai 18.9 streaming a ni hman a, digital download pawh nasa takin a pung.
A hmasa berin 2003 khan Bey-i number one hmasa ber tur hi Jay Z nena an thawhdunna ‘Crazy In Love’ a ni a, July thla khan kar thum chung pakhatna a ni.
Thla tam a liam hma in, Sean Paul nena an thawhdunna, ‘Baby Boy’ chu kar nga chhungzet number one a ni leh a, 2006 ah phei chuan hla hit nei chho zar zarin, Jay Z nena an thawh dunna, ‘Deja Vu’ leh ‘Irreplaceable’ chu December khan chart-ah ber nihna an hauh.
Kum 2008 khan Bey hian Hot R&B/Hip-Hop chart-ah a chet ropui ber ni tuirn, ‘Single Ladies (Put A Ring On It’ chu a vawrhchhuak ta a, November thla thleng khan kar 12 chhungzet ropuina ram vawrtawpah a chuanchhuahpui.
Kum li a liam leh a, March 2012 khan ‘Love On Top’ hmangin kar sarih chhung top-ah a awm leh a, 2014 khan ‘Drunk In Love’ leh ‘7/11’ hmangin karkhat chhung ‘ber’ nihna a lo hauh tawh bawk.