Rahul Gandhi chu Congress president atana duhtu an awm mek zel a, Chhattisgarh leh Rajasthan-a an party chuan an chief atan an duh tih resolution an siam.
State pahniha Congress committee hian party president atana Gandhi-a an duh thu hi an sawi a. Chhattisgarh Chief Minister Bhupesh Baghel chuan Pathianni khan Wayanad MP hian a thutlukna siam tawh chu ngaihtuah tha leh se a duh thu a sawi.
“Chhattisgarh Congress Committee leh Rajasthan Congress Committee chuan ruahmanna a siam a. State pahnihin kan duh a, state dang atang pawhin a lo kal zel ang a, Pu Rahul-a hian he thil hi ngaihtuah chiang rawh se,” tiin Baghel-a hian a sawi.
Party president inthlan tur chungchang ngaihtuaha Chhattisgarh Congress thukhawm chuan Gandhi-a chu ngei tura an duh tih thutlukna an siam a ni.
Thutkhawmah hian Chief Minister Baghel bakah an party state in-charge PL Punia leh hruaitu dangte an tel.
Rajasthan Congress Committee pawhin Gandhi-a chu party president atan an duh tih an sawi a. Chief Minister Ashok Gehlot-a’n an thutkhawmnaah Congress president tur rawtna hi chhawp chhuakin an thlawp a, RPCC state president leh AICC palai tur pawh party president-in thlang se an ti.
Congress Working Committee member Raghuveer Meena chuan Gehlot-a rawtna hi pawmin State President Govind Singh Dotsara pawhin an thlawp bawk.
State pahnihin party president atana an duh thu an sawi hma lawk hian Congress-in Bharat Jodo Yatra an kalpui mekah Wayanad MP chuan, “Kei hi president ka nih leh nih loh chu president tur thlan hunah a chiang dawn a ni; mahse, ka tih tur atan thutlukna ka siam tawh a, ka rilrua awm hi ka hnial thei lo,” a ti.
Gandhi-a hi duhtu awm nual mah se amah hian Congress president nih hi a duh tawh loh thu a lo sawi fo tawh thin a, ni leh tura hmin tuma dawr pawh an tam hle nia sawi a ni.
Gandhi-a hi kum 2017 leh 2019 inkar khan Congress president a lo ni tawh.
Kum 2017-a president atana thlan a nih dawn pawh khan tuna mi ang bawk hian state hrang hranga an unit-ten an duh thu resolution an siam hlawm a. Kum 2019-a Lok Sabha inthlana an chet chhiat hnuah khan a bâng a ni.