Aizawl: Tunlaiin Mizoram hmun hrang hrangah sazu a puang a, hmun thenkhatah chuan loa buh zawng zawng a ei chhiatte pawh a awm.
Agriculture department hotute chuan Mizoram hmun thenkhatah sazu a puang ngei tih an sawi an sawi rualin hmun thenkhata buh tichhetu chu sava a ni thei tho niin an sawi.
Tun hnaia sazu puangin a beih nasatna hmun chu Lunglei district-a Mualthuam North khua niin an khaw ram chhunga Berum zau leh Tlangdung zau-ah a puang nasa zual nia thudawn a ni.
Sazute hian Mualthuam North khuaa lo neitute thlai chi hrang hrang an ei chhiatsak a. Kumin August thla tawp atang khan buh an khawih tan a, mi pakhat lova buhte chu sazu puang hian an ei zo vek niin thudawnna chuan a sawi.
Agriculture department chhinchhiah chinah West Phaileng Block chhunga khaw parukah pawh sazu hi a puang mek a, sazu chet nasatna ber chu Tuirum khua niin, chhungkaw pasarih loa buh zawng zawng an ei chhia a ni.
Khaw dangah chuan sazu chu inlar mah se loa buh zawng zawngte erawh an ei chhe lo va. Damparengpuiah chhungkaw 150 lo, Khawhnai-ah chhungkaw 35, Saithah-ah chhungkaw panga leh Lallen-ah chhungkaw 50 loah sazu a inlar a, Kawnmawi khuaah chuan buh bakah vaimim an ei chhe tel bawk.
Zawhna chhangin Agriculture department hotute chuan tun dinhmuna sazu an beih dan ber chu tûr a ni a, sazuin a beih lo neitute chu tûr an pek thu an sawi.
Hetihlai hian hmun thenkhatah thangnang a puang/kai nasa hle bawk a, thangnang puang/kai leh khau puang hi Mizo upate chuan tampui mitthi emaw, chhiatna lo thleng tur emaw hrilhlawktu (bad omen)-ah an ngai a ni.