Aizawl : Govt. Aiza- wl, ITI-in Inrinni khan ITI-a zirchhuak mi 143 te thlahna hun an hmang a, TATA Motors Ltd. (TML) leh HYUNDAI Motors India Ltd. (HMIL) te nen thawhhona thu an thlung bawk.
Convocation-ah hian zirlai 143 te hnenah certificate hlan a ni a, zirlai kalchhuak zinga a ti tha zual 3 te Award hlan an ni. Result chhuak hnuhnung berah overall pass percentage 97.14 % a ni a, Govt. ITI Mizorama a din tirh atanga result that ber tum niin, state hrang hrang zingah Govt. ITI, Aizawl chuan parukna dinhmun a hauh bawk. Govt. ITI, Aizawl-ah hian kum kal mek (2022-23)-ah zirlai 384 an awm.
ITI-a zirchhuakte thlahna hun hmanpuitu LESDE Deptt. Secretary Lalramsanga Sailo chuan Mizoramah ITI zirna in hma a sawn zel thu leh India rama Govt. ITI sang chuang zinga result nei tha pawla Govt. ITI, Aizawl a lang thei chu chhuanawm a tih thu a sawi a. Ramin hma a sawn zel theih nan leh thalaite thiam thil hm- anga mahni kea ding thei tura hma a sawn zel nan, ITI tihchangtlun zel a pawimawh thu a sawi bawk.
Inrinni vek khan Govt. ITI, Aizawl hian TATA Motors Ltd. (TML) leh HYUNDAI Motors India Ltd. (HMIL) nen thawhhona thu an thlung a. TML nen kum 5 atan thu thlungin, TML-in machinery leh equipments te ITI-ah an dah anga, zirlai ten an course kalpui lai tibuai lovin TML training module an kalpui tel ang a, TML authorized workshop-ah te on the job training an kalpui thei ang.
HMIL nen kum 4 atan thu thlungin HMIL-in module leh cut-section model hrang hrang, unregistered car te ITI-ah an chhawp ang a, zirlai ten Hyundai motor dealer leh representatives-ah te practical training an nei thin ang.