Japan-a chhanchhuah hna thawktute chuan kum tam tak chhunga thlipui leh ruahpui an tawrh nat ber tum an tawrhah lei min leh tui lian nasa tak a thleng a, a la thleng zui zel thei niin an sawi.
Pathianni zinga Typhoon Nanmadol-in chhim lam thliarkar, Kyushu a kai hnuah hian hriat theih chinah mi pali an thi tawh a, mi 100 chuang hliam tuar an awm.
Thawhlehni thleng khan chhungkaw 1,40,000 chuangin electric an la nei lo.
Nanmadol hi tunah chuan chak lo tawhin cyclone chauh a ni tawh a, an ram hmun hrang hrang a hrut kual hnuah tuipui a lut leh tawh.
State broadcaster NHK chuan tui lianin a car a lak avangin mipa pakhat a thi tih an sawi a, lei minin mi pakhat a chhilh bawk a. Mi dang pahnih ruang hmuh a ni bawk a. Mi 114 vel hliam tuar awmin an zinga 14 chu an dinhmun a tha vak lo.
Super typhoon thawk hian darkar khata km 234-a chak thlipui kengin in, inkalpawhna leh sumdawnna hmun a nuai nasa hle a. Hurricane category four emaw, five emaw ang vela na a ni.
Ram khawpui ber, Tokyo-ah chuan ruah tam tak a sur a, Tozai lei hnuai rel chu a chhunga tui a luh nasat avangin khar rih a ni a. Rel chak chi, lawng leh thlawhna thlawk tur tam tak thulhtir an ni a; dawr leh sumdawnna hmun dang khar a ni a. Tual chhung mite video thehdarhah thlipuiin in chung a la lai leh khawlaia thil tar a len laite hmuh tur a awm.
Prime Minister Fumio Kishida pawh New York khawpui tlawha UN General Assembly-a thu a sawi tur chu Thawhlehni thleng atan a thulh rih a, chanchin a ngaichang rih mek.
Scientist-te chuan kuminah hian hurricane season-a a thawk a tam zual niin an sawi a, hei hi khuarelin a siam, La Niña an tih insiam a awm vang a ni.
Atlantic leh Caribbean tuipui chung chu sik leh sa inthlak nasa avangin a lum hle a, hei hian hurricane a siam hma hle a ni.