President Joe Biden chuan Covid avanga American thi an pun leh hret mek laiin US-ah chuan hripui leng a tawp tawh tih a sawi.
“Hna kan la thawk mek zel a; mahse, hripui leng chu a tawp tawh,” tiin Biden-a hian television-a an kawmnaah a sawi.
Statistics atang chuan ni tin American 400 chuang hri avang hian thi ziah anga chhut a ni.
World Health Organization (WHO) hotupa pawhin kar hmasa khan hripui leng reh hun chu ‘hmuh phak’ lek a nih tawh thu a lo sawi tawh bawk.
Pathiannia CBS programme pakhat, 60 Minutes-a an kawmna an tihchhuahah Biden-a chuan hma nasa takin an sawn a, hripui lengah hna nasa takin an la thawk mek zel tih a sawi bawk.
An kawmna hi Detroit Auto Show neih paha tih a ni a, president hian entu mipuite pawh chibai a buk lai a lang.
“I lo chik chuan tumahin hmai an tuam tawh lo tih i hmu ang,” a ti a. “Mi tin dinhmun pangngaiin an awm a, thil a inthlak leh tawh a ni,” a ti bawk.
Hetih lai hian sorkar hotute chuan US chanchinbumite hnenah Thawhtanni khan an kal dan thlak tumna a la awm rih chuang lo tih an sawi thung a, Covid-19 public health emergency an puan chu hlih an la tum lo.
August khan US thuneitute chuan public health emergency an pan chu an pawt sei a, January, 2020 atanga an tan chu October 13 thleng atan a ni mek.
Covid vang hian American maktaduai chuang an thi tawh.
Johns Hopkins University chuan ni sarih liam ta chhungin ni tin mi 400 chuang an thi ziah a, chawlhkar khat liam ta chhungin mi 3,000 chuang an thi.