Aizawl: MLA L.Thangmawia’n nimin khan Bangalore-a Central Silk Board (CSB) hmunpui a tlawh a. CSB Member Secretary & CEO Rajit Ranjan Okhandier leh CSB Consultant Moncy Issaac, Joint Secetary (Rtd.) te nen inkawmin nasa zawka Mizoram lam hawi turin a ngen.
L Thangmawia chuan Mulberry Sericulture project atana Rs. vbc 10.67 leh Mega Project on Eri culture chhungkaw 3,000 tana project CSB hnena thehluh tawhte chu a rang lama pawmpui turin CSB hotute chu a ngen a. Mizorama sericulture lama hmalakna hrang hrangte a hrilh bawk.
Muga pangang khawi kawngah sik leh sa inthlak avangin hmarchhak state dangin harsatna an tawh thu L Thangmawia chuan CSB hotute chu hrilhin, Muga pangang khawi chu Mizoram chauhva kalpui tura ruahmanna siam a tul thu a hrilh a. Zoram kuthnathawktute tana tha tih chhante hrilh nghalin, Mizoram sorkar rawtnate CSB-in a tihlawhtling thei a nih chuan Mizote mil eizawnna, hlawhtling taka kalpui theih, India ram tan pawh chhenfakawm khawp hlawhtlinna Mizoramah a thleng thei niin a sawi.
CSB Member Secretary Okhandier pawhin Mizoram sik leh sa chu silk pangang khawina atana duhthusam a nih thu sawiin, an theihna apianga pui tura an inpeih thu L Thangmawia chu a lo hrilh niin sorkar thuchhuah chuan a tar lang a. State sorkarin a tul anga a bawhzui apiang theihtawp an lo chhuahpui tur thu an lo hrilh niin sorkar thuchhuah chuan a tar lang bawk.
L Thangmawia chuan CSB-in Scientist D Dr Lalthlamuana Pachuau deputation-a Mizoram sorkara a kal an phalsak avang te, Eri Silk project chhungkaw 400 tana Rs vbc 15.73 atanga vbc 7.924 kumin March-a an release-sak avang te, chhungkaw 350 tana Eri culture-a Rs vbc 14.87 an pawmpui tawh avang tein CSB hotute chu lawmthu a hrilh bawk a ni.