Adani Group chairperson Gautam Adani chu India rama hausa ber a ni ta niin, IIFL Wealth Hurun India Rich List 2022-ah tarlan niin, nikum 2021 khan nitin cheng vaibelchhe 1,612 nei belh zel anga chhut a ni bawk.
Nimin September 21 nilaini report-ah hian Gautan Adani hi a lerah a chuangchhuak ta a, billionaire thahnem tak kalsanin, a chungnung fal ta hle.
Kum 60 mi hian a elpui leh rualpuite a khum fai vek a, Adani Group tan Ni duhawm leh chhinchhiahtlak tak a lo inherchhuak a, Hurun India rich list-a a hausakna tarlanah chuan cheng vaibelchhe 10,94,400 chuang a ni.
Nikum chhung ringawt pawh khan a hausakna hi 116% zetin a pung hluai tawh a, kumkhat chhung lek khan cheng vaibelchhe 5,88,500 a pun belh. A sumdawnna chelh ding thei an awm lova, hmalam panin chak takin a kal vuk vuk mai a ni ber.
Kum 5 liamta khan first-generation entrepreneu ni bawk hausakna hi 1,449% in a pung hluai tawh bawk niin, Hurun India report-ah tarlan a ni.
Bloomberg Billionaire Index, tunhnaia tihchhuah ah pawh khan Adani hi $Billion 150 hausakna nen khawvela hausa ber pahnihna a han ni zui hman nghe nghe a, a chungah Tesla leh SpaceX CEO Elon Musck hiah awmin, pahniha rei tak hauh tawh Amazon hotupa Jeff Bezos a nek thla chiang hle. Karhmasa mai khan!