Central YMA hnuaia NHIDCL hnathawh lai mek viltu, Monitoring Committee chuan nimin khan Zemabawk leh Thingsulthliah inkara NHIDCL hnathawhte tlawhin an enfiah.
Central YMA team-te chuan NHIDCL-ten kawng an laihna leivung an paihna hmun leh an paih dan te, culvert an siam te, kawngpui dâwlna an siam mek leh kawng tihzauh nana kopang lam an laihte min tur ven nana hydro-seedling & mulching hmanga thlai, thing leh mau an chin mek te an enfiah.
Monitoring Committee chuan NHIDCL-in leivung an paihna hmuna phalna an neih ang angte chu a copy pe turin an hriattir a, phalna pek an nihna hmun lovah chuan leivungte chu paih tawh lo tur te, an lo paih tawhna zawng zawngah pawh leivung paihin environment a tihchhiat loh nan a dawlna siam vek tur leh an lung hman tha lo nia an hriatte pawh a tha chauh hmang turin anmahni lo dawngsawngtu, NHIDCL Executive Director Virendra Jhakhar leh a hote chu an hrilh.
NHIDCL hotute chuan Central YMA ngenna chu tha taka tihhlawhtlin an tum tur thu leh hun remchangah kawngpui an siamnate enho leh turin an sawm nghal bawk a ni.
Central YMA Monitoring Team hi an chairman, Lalhmachhuana, Central YMA Vice-President ni bawkin hovin NHIDCL hotute nen hian kawngpui an sialna hmuna ram neituten compensation an hmuh tur ang angte rang taka an hmuh theih dan turte pawh an sawi ho.
NHIDCL hotute chuan Silchar leh Aizawl inkara four lane kawngpui an laih leh dawnah chuan spoil bank tur felfai taka buatsaih lawk vek a, leivung dâwlnate siam hmasak vek an tum tawh thu Central YMA team hnenah hian an sawi bawk a ni.