Nimin September ni 21 kha khawvel puma Alzheimer’s vei te ni ‘World Alzheimer’s Day’ a ni a. Aizawlah pawh Alzheimer’s & related disorders society of India (ARDSI), Mizoram Chapter-in zingkarah hun hmangin, Chanmari atanga Millennium Centre thleng ‘Memory Walk’ an huaihawt a, Social Welfare Minister Dr. K. Beichhua-a’n a telpui.
Social Welfare Minister chuan Alzheimers chu thluak lam natna chi khat a nih thu sawiin, “Mihring kan nih chhung hian thil tha tam tak Pathian atangin kan hmu a, thil thalo te pawh tam tak a thleng ve dawn a ni” a ti a. Alzheimers natna pawh midang chung chauha thleng tura ngaih loh tur a nih thu leh mahni chunga thleng thei reng a ni tih hriat tur a nih thu a sawi.
Alzheimers lan dan tlangpui sawiin, Dr K Beichhua chuan haihawt te, nunphung inthlak thut thut te a nih thu a sawi a. “Kan nu leh pa te hunah kha chuan an lo hrethiam lova khawhring manah te, ramhuai thil tihah te an ngai thin” tiin, “tunah chuan damdawi lam hmanruate a changkang tawh a, natna te pawh kan hrechhuak zung zung thei ta a. He natna hi enkawl theih a ni a, amaherawhchu vanduaithlak takin tihdamna a la awm lo a ni,” a ti.
Dr. K. Beichhua chuan, “Alzheimers veite puala ‘memory walk’ kan neih hian Mizoram mipuite thu ropui tak kan chah a ni” a ti a. “A tihdamna la awm lo alzheimers veite chu a enkawltu kan nih a ngai a, alzheimers natna chungchanga mite hnena awareness petu ni zel turin kan inchah a ni,” a ti bawk.
ARDSI, Mizoram Chapter President Vanneihtluanga pawhin “He natna hi kan hrechiang a, a rapthlak dan te, a beidawnthlak dan te, chutihrual chuan Pathian malsawmna a nih zia te kan hrechiang em em a ni” a ti a. He hun hmang tura a tuartute ngei wheelchair a nawr thlen te an awm laiin, tel ve thei lo te pawh an hriatreng thu sawiin, a enkawltute chu “hah tak leh rim taka dawh- theihna leh hmangaihna nen in chhungte in lo enkawl thin avangin lawmthu kan sawi a ni,” a ti.