Uttar Pradesh hmun thenkhatah ruah sur nasa kaihhnawiha chhiatna hrang hrang thlengah mi 10 vel an thi.
Ruah sur nasa hian Firozabad nasa taka tibuaiin thi zinga mi pasarih hi Etawah-a mite niin tek tla, bang chim leh in chim avangin mi 11-in hliam an tuar bawk a. Aligarh-ah chuan Inrinni thleng sikul chawlh puan a ni.
Etawah-a thi zinga pali chu chhungkaw khata naupang an ni a. Firozabad-ah mi pahnih leh Balrampur district-ah mi pakhat an thi bawk niin thuneitute chuan an sawi.
India Meteorological Department chuan ruah nasa taka sur leh tek tlain Nilaini tuk atangin Uttar Pradesh a tuam dawn tih an lo sawi lawk tawh a. Etawah observatory chuan Nilaini zing atanga Ningani zing dar 8:30 thleng khan ruah mm 140 a sur tawh niin an chhinchhiah a. Agra-ah pawh a sur tam hle.
Etawah district-ah hian Nilaini zan khan bang leh in chim liantham hmun thumah a thlengin hengah hian mi pasarih an thi a ni.
Etawah-ah vek hian Andava ke Banglan khuaah in chimah mi pakhat a thi bawk.
Firozabad-ah pawh Banshinagar-ah in chimah mi pakhat thiin a chhungte dang pariatin hliam an tuar a. Nagla Gawe khuaah bang chimin mi pakhat a delh hlum bawk.
Thuneitute chuan ruah sur nasa lutuk hian ni hnih chhung chu Firozabad-ah hian nunphung pangngai a tikhaihlak nasa hle niin an sawi a, khawlaia tui tling a tam hle.
Balrampur district-a Bargadwa Saif khuaah tek tla avangin unau (cousin) naupang pahnih chu nasa takin an kang tih Ningani khan police-in an sawi.
Aligarh district-ah ni thum lai ruah a sur tawh avangin khawlaiah tui a tling nasa hle.
District Magistrate Inder Veer Singh chuan Inrinni thleng zirna in khar vek turin thu a chhuah a ni.