Aizawl: Tlabung Sub-Division huam chhung, Khojoysury VC-a chhungkaw 160 velte leileta buh chu rannung chi khat, brown planthopper-in a eichhiatsak a, leilet siamtute harsatna tawh dan hi Lunglei District Agriculture hotuten an enfiah nghal.
Leilet enfiahtu, Lunglei DAO C Malsawmkima chuan Khojoysury-a leileta buh ei chhetu, brown planthopper chu Mizoten katnelh an tih mai thin a ni tih sawiin, “Hetiang hi an lifespan a thui lo a, reilo te chhungin an inthlahpung chak em em a ni,” a ti.
Rannung thahna hlo an ken hmangin tuna la chhe ve lo buh eng emaw zat chhan theih an inbeisei thu sawiin, anmahni puih theih dan kawng awm ang ang dap tura department-in theihtawp a chhuah tur thu a sawi.
ATMA Dy. Project Director John Laltluangliana chuan buhin a huat em em an pai tel avangin planthopper-in a ei tawh buh kung chu a ro nghal mai zel niin a sawi a; tun tuma damdawi an ken chu rannung hnawh darhna mai ni loin, a thah nghalna hlo a nih avangin, awmzia a neih ngei a beiseiawm thu a sawi a ni.
Khojoysury khawtlang hruaitute chuan tun tuma leilet siamtute harsatna tawh ang chu tun hmain an la tawng ngai loh tih leh kar hmasa vel atang khan hetiang harsatna an tawk tih an inhre tan niin an sawi.
Harsatna an tawh chungchang sutkian dan kawng ngaihtuaha Lunglei DAO-in chak taka hma a la nghal chu lawmawm an tih thu leh thlamuanawm an tih thu an sawi a ni.
Hriat theih chinah Khojoysury khuaah tih loh, Tlabung chhehvel khaw dangah planthopper vanga leilet siamtuten harsatna an tawh thu hriat a ni rih lo.