Muslim pawh sawi hlawh tak, Popular Front of India (PFI) chu ram chhung hmun hrang hranga an pisate dapa an member eng emaw zat man an nih hnuah Zirtawpni khan Kerala-ah an miten nasa takin duh lohna an lantir.
India-a firfiakte chhuitu, National Investigation Agency (NIA) leh sum leh pai thubuai lam changtu, Enforcement Directorate (ED) chuan Ningani tuk khan state 11 zetah PFI pisa hi dapin an member 106 an man bawk niin Press Trust of India (PTI) chuan a tar lang.
TV channel News18 chuan tun tuma an chetna hi NIA hian thil an chhuinaa a lian ber a nih thu an sawi niin a tar lang bawk.
Ningani tlai lamah pawh khan PFI member-te chuan Kerala leh Tamil Nadu-a an hruaitute man an nih duh lohna hi an lo lantir tawh bawk.
“Ram pum, state leh tual chhunga PFI hruaitute in pawh dap a ni,” tiin an pawl hian thu an chhuah a, sorkar chuan a hnuaia agency-te chu ‘an aw tihzawihsakna atan a hmang’ niin an puh.
NIA-in thuchhuah an siamah chuan thubuai panga kaihhnawihah mi 45 an man niin an tar lang.
Agency hian hmun an dapnaah hian ‘lehkha rinhlelhawm, pawisa, hmanraw hriam tak tak leh digital device tam tak an man’ tih an sawi bawk.
Kum 2006-a indin, PFI hi anmahni insawi dan chuan ‘non-governmental social organisation niin an tum chu ram chhunga mi rethei leh chanvo tha chang ve phak lote tana thawh leh inneksawr leh nekchepna dotu’ an ni.
PFI hi kum 1992-a Babri mosque chhut chhiat a nih hnua Keral-a din, National Development Front (NDF) hnu fea din a ni a, NDF leh pawl dang pahnih nen insuih finin an inzawm zui a. |hang zelin India ram pumah pawl dang dang nen an inzawm ta zel a ni.
Kerala leh Karnataka -ah hian an tam hle a, state dang 20 velah inzar pharh tawhin an tam lam hi ‘sang tel fe’ nia hriat a ni.