Storm Fiona-in Canada tuipui kamte a nuai a, power line tam tak chhiain chenna inte pawh tuipuiah a len lut.
Newfoundland-ah hmeichhe pakhat tuiah len luh a nih avangin chin hriat lohvin a awm mek.
Fiona hi Zirtawpni khan hurricane atangin a chakna hlohvin tropical storm chauh a ni tawh a. Canada-ah hetiang hi an tawn khât tak a ni a, police chuan ‘tun hmain hetiang kan la tawng ngai lo’ an ti.
Nova Scotia-ah chuan hnawmhnawk thian turin sipai tirh luh an ni dawn.
Province pangaa hmun eng emaw zat chuan ruah tam tak bakah darkar khata 160-a chak thlipui an tuar a. Tui a lian a, chhungkaw sang tam takin power an nei lo bawk.
Prime Minister Trudeau chuan Nova Scotia-ah sipai tirh an nih tur thu a sawi a, “Sorkar laipuiin tih ve theih kan neih apiang chu kan ti zel ang,” a ti.
Japan-a prime minister hlui, Shinzo Abe-a vuinaah pawh tel tur ni mah se tunah rih chuan khuarel chhiat an tawh an chin fel hma chu kal a tum rih lo.
Atlantic tuipui hrula Nova Scotia, Prince Edward Island, Newfoundland leh New Brunswick province bakah Quebec hmun thenkhatah tropical storm warning tihchhuah a ni.
Newfoundland chhimchhak kil, mihring 4,067 chenna, Port aux Basques-ah chuan tui lianin chenna in leh pisate tuipuiah a len lut niin tual chhung chanchinbumiin a sawi a. Emergency puan mek a ni.
“Helai hmun hian a thil tawn rapthlak ber a tawng mek a, hetiang hi ka la hmu ngai lo,” a ti.
In tam tak tuifinriatah a liam lut mek niin a sawi a, “Apartment building pawh a bo va, kawtthler pawh a hnawk hle,” a ti.
Thuneitute chuan chenna in 20 vel chân a nih thu an sawi.
Royal Canadian Mounted Police chuan hmeichhe pakhat, a in tuiin a lak avang tuipuia tla chu an chhanchhuak tih an sawi.
Hmeichhe dang hnen atangin a in chhuat tuiin a lak thu an dawng bawk a; mahse, chet chhuah nan a la hlauhawm avangin an la pui thei lo.
Power company-te chuan electric siam tha leh vek tur chuan hun a la duh deuh dawn tih an sawi a, thli na tak a thawh atangin power line-te hi a chat hlawm a ni.