Aizawl : MNF party adviser Lalruatkima’n “Congress party-in that loh theihlohna bawm an tihah ṭha thei reng renglote an inkhungkhawm a. ZPM – kalphung thar zuartute hian party hming, symbol leh flag bak thlak an nei lo” a ti.
Dawrpui Vengthar MNF unit buatsaih mithar lawmluh inkhawmah he thu hi tunkar Thawhtanni zan khan Lalruatkima chuan a sawi a. “Pathianin he sorkar hi min pe a, kan ṭha bik e, kan ti hauh lo; mahse, he sorkar hi Pathian min pek a ni,” a ti.
Minister of State ni bawk Lalruatkima chu- an “Covid hripuiin min nuai avangin duhthusam kan thleng phak lo tih chu kan hria. Mahse, mipui rawng kan bawlnaah mipuite leh Pathian avangin theihtawp kan chhuah mek zel” a ti a. Hripui, Vawk hri, lirnghing, ramri buai leh hun khirha Zoram hruai chhuak turin Pathianin MNF sorkar a ruat nia sawiin, Mizo politician zingah Zoramthanga aia ṭha an awm lo niin a sawi.
Lalruatkima chuan “Opposition hovin SEDP kan sem theih an ring lova, kan sem ta mek a, ‘sum harsat lai lai’, an ti leh lawi si. Engpawh ni se, SEDP hi kan la sem zel ang, kan pek belh zel dawn” a ti a. Inthlan lehah pawh SEDP sem chhunzawma, Zoram hmasawnna kalpui chhunzawm turin Zoramthanga hruai MNF sorkar a din leh a rin thu a sawi bawk.