Aizawl: BJP, Mizoram state President Vanlalhmuaka’n, “MPCC President Lalsawta hi MADC inthlan chungchangah a thusawia a din loh avangin rin ngam a ni tawh lo,” a ti.
BJP Pisapui Atal Bhawan, Aizawla political session-ah he thu hi nimin khan BJP, Mizoram state president chuan a sawi a. Congress party-in district hrang hranga campaign beihpui thlaka an president, Lalsawta chu a thusawia ding ngam a nih thu leh sorkarna an chan chuan minister leh MLA ei rute bân an tum thu an sawi chu, “Meng reng inbumna mai a ni,” a ti.
Vanlalhmuaka chuan, “Congress President Pu Lalsawta hian rintlak a ni tih mipuiah a lanna turin MADC election-a a thusawiah khan a ding ngam dawn em tih hi kan zawhna a ni,” a ti bawk.
BJP president chuan Congress party chu opposition an nih laia an sorkar huna an tih leh tak tak loh tur tih tum anga insawi chingah a puh a. “Tuna an kalphung hi chinghne beram vun sin ang mai an ni a, dik awm taka lang ni mah sela, ngaihtuah chian chuan dik si lo sawi an ching thin hi kan ram chhiatna bul a ni,” a ti.
ZPM Leader Lalduhoma pawh mahni thusawia chiang lo nia sawiin Vanlalhmuaka chuan, “Election hmasa khan Pu Lalduhoma hian, ‘Kan sorkar chuan corruption tite chu kan ngaidam vek ang,’ a ti tawh a, tun hnaiah, ‘Corruption tite kan hrem ang,’ tih a sawi leh bawk a, mahni thusawia chiang lo, mahni sawi hnu pawh hre chiang lo hi a buaithlak,” a ti.
Vanlalhmuaka chuan, “BJP chuan corruption hi kan ram tichhetu a nih avangin kan do mai ni lovin, mi corrupt-te chu CBI ko lutin kan hnungkhirh dawn a ni,” a ti a. Kum 2023-a MLA inthlan lo awm turah Mizoram mipuiten BJP chu hnathawk theia an siam a ngai nia sawiin, “Mizoram mamawh hrang hrang leh mipui mamawhte a taka pe theitu chu BJP kan ni,” a ti bawk.