ZPM, Hachhek North block-in Hachhek tlangdung mipuiin an Kuhva thar te hralh kawngah harsatna an tawk nasa nia sawiin, an harsatna sutkiansak tura chak taka hma la turin Mizoram sorkar an phut.
Hachhek tlangdunga chhungkaw tam takin Kuhva chin chu eizawnna bulpui bera an neih a nih thu ZPM, Hachhek North block chuan sawiin, kumina an Kuhva thar te chu tun thlengin an hralh hleitheilo niin an sawi a. An Kuhva thar hralh hun thlir chunga bank loan la pawh an awm thu leh an mangan tawh takzet thu an sawi.
Kuhva an hralh thei lo chuan khawtlanga sum virvel pawh nasa takin a nghawng nia sawiin, inhlawhchawp leh eichawp dapte thlengin an tuar niin an sawi a. Kuhva chu an pi leh pu te atanga an eizawnna a nih thu leh changdang kan thei an nih tawh lo thu sawiin, an innghahna pui ber an hralh theih tak loh ah chuan Hachhek tlangdung mipuite hmabak chu a thim hle niin an sawi.
ZPM, Hachhek North block chuan an buaina bul ber pakhat Mizoram chhunga kudam hrang hranga ramdang Kuhva awm reng pawh a rang thei ang bera a bo a bang awm lova tiral thuai turin sorkar chu an phut a. Aan Kuhva thar te an hralh theihna tura theihtawp chhuahtu, Hachhek bial Kuhva chingtu pawl (HKBCP) leh YMA Langkaih group & Taitesena group joint study team te hmalakna an thlawp tlat thu an sawi bawk.