Aston Villa in Fulham an tlawh a, chiang taka 3-0 a an tlawm hnuah an manager Steven Gerrard chu a hna atangin an chawlhtir.
Midlands club hi Premier League-ah 17-naah an awm mek a, 18-na a awm Wolves lakah goal difference chauhin an sang zawk. Hetiang a nih vang hian Gerrard-a lakah hian ‘pressure’ hun engemaw chen atangin a sang tawh.
Craven Cottage a inkhelah Fulham tan hian Harrison Reed chuan minute 36-naah goal khungin bul a tan. Villa goalkeeper Emiliano Martinez chuan a hma zawnah corner atanga ball kal chu a hnek chhuak a, Reed-a’n a pet let hi a dang thei tawh lo.
Fulham an hlauhawm thei hle a, Andreas Pereira chuan tum hnih goal a khung teuh viau bakah Aleksandar Mitrovic tauh goal tur Tyrone Mings-a’n a lo pet chhuak hman hram.
Second half-ah Villa buaina belhchhah turin Douglas Luiz chu Mitrovic a tauh luih avangin hnawhchhuah a ni.
Minute 68-naah Mitrovic-a’n penalty atangin goal a khung a, huntawp hma in Mings-a’n an lamah a ti goal bawk.
Gerrard-a hnuaiah hian Villa hi tun season-ah league-ah vawi hnih chiah chak an la nei a. An squad enin hei hi tha tawk lova ngaih niin Villa fans te chhuak se tiin an inkhelh chhungin an au nasa.
First-team coach Aaron Danks chuan tun kartawpa Brentford nena an inkhel tur a enkawl ang.
Gerrard rual hian a coaching staff – Gary McAllister, Neil Critchley, Tom Culshaw, Jordan Milsom leh Scott Mason te pawhin club an chhuahsan.
Gerrard hian nikum November thla khan Dean Smith thlakin Villa manager hna hi a thawk tan a. A hnuaiah Villa hian game 40 khel hmangin heng zingah 13-ah chiah hian hnehna an chang thei.