Aizawl : MNF thalaiin ZPM party chu thudik famkim tawklo hmanga Mizoram mip- ui bum tum thinah puhin, sum turin an ngen.
MNF thalai chuan “ZPM-in kar kalta Inrinni-a Dampa East block-a political training an hmanpuinaa ‘Zoramthanga kaihhruai MNF sorkar an sawi chhan tih hriat taka, Aizawl by-pass road atan vbc 500 leh bamboo link road atan budget-ah vbc 100 an dah theih chuan keini pawhin budget-ah vbc 1000 kan dah thei’ tia an sawi hi nuihzathlak kan ti” an ti a. Mizoram mipui bum tumna leh budget kalphung hre lo zawk ZPM mipuite thudik chanve hmanga bual ât tumnaa an ngaih thu an sawi.
Kum 2022, February ni 1-a Union Finance Minister-in sorkar kum 2022-2023 atana budget a pharhah India hmarchhak state pariat te a bika enkawlna tur Prime Minister’s development initiative for northeast (PMDevINE) ruahman a nih thu MNF thalai chuan an sawi a. He ruahmannaah hian hmarchhak state pariat te tan vaibelchhe 1500 dah niin, heng zinga vbc 600 chu Mizoram tana ruahman a nih thu an sawi.
MNF thalai chuan Aizawl khawpui chhung traffic jam tihziaawmna tur project, ‘Aizawl by-pass road’ Rs. vbc 500 senna tur leh loneitu ten an huan leh lo awlsam zawka an pana an thlai thar awlsam zawka an phurhchhuah theihna tur ‘Bamboo link road’ siamna atan vbc 100 zet chu PM-DevINE hnuaiah dah a nih thu an sawi bawk.
Mizorama hmasawnna ruhrel lian siamna tur project pahnihte chu Prime Minister kaihhruai Union cabinet meeting pawhin a pawmpui thu MNF thalai chuan an sawi a. Mizoram budget aṭanga sum chengkhatmah sen belh ngai lo tur, central funding tura pawm a nih thu an sawi.
MNF thalai chuan sorkar laipui budget-ah Mizoram tana hmasawnna liantham siamna tur Rs vbc 600 dah chu Union Territory (UT) leh state nih hnuah pawh Mizoramin a la tawn ngai loh a nih thu an sawi a. “Hetiang khawpa tam Mizoram hmasawnna sualchhuaktu Chief Minister Pu Zoramthanga hi MNF thalaite chuan ropui kan tiin kan chhuang takzet a ni” an ti bawk.