Formula 1 world champion ni chiang tawh Max Verstappen-a’n an team in chet fuh loh an nei chungin hmahruaitu Lewis Hamilton chu intlansiak tawp hma in a lehpel thei tho a, United States Grand Prix-ah pakhatna a hauh.
Red Bull driver in pakhatna a hauh a, an driver dang Sergio Perez chuan palina a hauh bawk laiin Ferrari car khalhtu pakhat zawk Carlos Sainz a tlan zo thei lo. Hei vang hian Red Bull Racing in contructors’ title an la chiang tawh.
Mercedes car khalhtu Lewis Hamilton chuan kumina a vawikhatna atan hnehna chan theih inbeiseina a nei a, mahse a tawpah erawh Mercedes W13 in Red Bull RB18 a phak lohna a sang mah mah.
Red Bull leh record
Circuit of the Americas tlankawnga intlansiakah a champion chian tawh avangin Verstappen-a’n ‘pressure’ a nei lo. Chutihrualin team inelna a champion an nih theihna intlansiak a ni a, chetsual an tum lo.
Red Bull in he title hi tichiang turin an elpui Ferrari aia point 19 a an hmuh tam a ngai.
Qualifying a tlan chak ber Carlos Sainz chu intlansiak tan tirah a vanduai a, George Russell-a’n a tai avangin a car a chhia. Hei hian Red Bull title a tichiang tluk a ni.
Verstappen a chungnung leh viau a, mahse pit stop a siam hnuhnung zawkah a car ke veilam an thlak fuh theih loh avangin Hamilton-a chan a tha hman. Amaherawhchu Red Bull car a dang tluan thei lo.
Verstappen hian tun season-ah intlansiak 13 a pakhatna a hauhna niin Michael Schumacher leh Sebastian Vettel ten season khat a chak hnem ber record an siam a tluk chiah.
Mahse Schumacher-a’n season khat a intlansiak 18 a awmin record a siam a. Vettel hian season khat a intlansiak 19 a awmin record hi a siam ve thung.
Hetihlai hian Red Bull Racing hi kum 2013 a an champion hnuah a vawikhatna atan contructors’ title an la ve leh bawk.