Pakistan atanga chhuak firfiak pawl, Lashkar-e-Toiba-a tel mi pathum chu Jammu & Kashmir Police leh venhim hna thawktuten Awantipora-ah an kap hlum a, heng mite hi tun hnaia heng lai vela mi tam tak tihlautu nia hriat an ni.
Mi firfiak kah hlum takte hi Pulwama-a cheng Mukhtar Ahmed Bhat leh Saqlain Mushtaq an ni a. Pakhat hi Pakistan-a cheng, Mushfiq a ni thung.
J&K Police-in an sawi dan chuan mi firfiak pathumte hian national highway chhehvelah pawikhawihna lian tak thlen an tum a. An kut atang hian AK-74 assault rifle man a ni.
Police chuan Bhat-a hi LeT hnuaia mi, The Resistance Front-a an commander a ni tih an sawi a. Pulwama-a cheng niin April 18-a a ni tlawh tura a chhuak chu a chin hriat zui a ni tawh lo va. Chhui zuinaah chuan TRF zawmin Pulwama velah a chetla nasa tih hriat a ni.
A hma pawhin Bhat-a hi tual chhunga TRF tana thawktu, overground worker niin commander hial a kai a. A thalaipuite zinga silai kenga ram do tur leh ram himna tiderthawng zawnga che tura hrilhtu a ni tih an sawi.
Bhat-a hi Pulwama-a Kakapora vela LeT-TRF len nana thawktu langsar tak a ni a. Pulwama-a Kashmiri Pandit, state dang atanga inhlawha lut leh politics-a inhmangte vauva an hlauhna tura che nasa thin a ni tih police hian an sawi bawk.
Gadoora, Pulwama-a May 13-a a chenna ina J&K police Riyaz Ahmed Thoker-a thahnaah pawh khan a inhnamhnawih niin an sawi a. Ugergund khua, Pulwama-a state dang atanga lut inhlawhfa pahnih beia na taka hliamnaah pawh a tel niin police chuan an sawi bawk.