Russia President Vladimir Putin-a thlalak thara a lan dan chuan a hriselna dinhmuna rinhlelhna a siam thar leh mek.
UK chanchinbu, Express chuan a kutah thil danglam deuh a awm thu leh a rawng pawh a dan thu an sawi a. Online-a entu tam tak chuan intravenous (IV) hnuhma ni ngeia an hriat thu an sawi hlawm.
British army officer hlui, House of Lords member Richard Danatt chuan Putin-a lan dan chu Sky News-a an kawmnaah pawh sawi chhuakin a hrisel leh sel loh chu nghawng nei tak a nih thu a sawi.
“Miten a kut chu a dum deuh niin an hmu a, inchiuna hnuhma a ni thei a. Heti a nih chuan a taksa peng dang hian inchiu a mamawh a nih theih bakah a dangah a chiu theih loh tihna a ni thei,” tiin Lord Dannatt chuan a sawi.
“A fit tha tawk em tih emaw, lemchangin a lang zawk emaw a ni thei a. Mit leh beng chhit ngunna tur a ni,” a ti bawk.
Thla tam vak lo liam taah khan US intelligent-te chuan Putin-a hian ‘cancer chi khat a nei’ nia rinna an neih thu an lo sawi tawh a. Kumin March thla khan Russian president hian thah tumna a pumpelh hlauh nia sawi a ni bawk.
Putin-a hi tun thlaa kum 70 a tling dawn.
Kremlin-a chanvo sang ber hi Putin-a hian kum 1999 khan chelh tanin Ukraine a rûn mek hi thuneihna a neih hnua chona a neih len ber ni mekin 1962 Cuban Missile Crisis hnua khawthlang ramte nena an inep nasat lai ber a ni bawk.
A lamtangte chuan khawthlangin an nawr chep lutukna laka Russian chhanchhuaktu angah Putin-a hi an ngai a. Cold War a tawp hnua an ram retheihna laka tun dinhmun hruai thlengtuah an ngai bawk.
Hetih lai hian Ukraine a rûn mekah hian a che tha tawk lo va. Russia hian sipai leh hmanrua a chân nasa tawk hle.