Aizawl: Land Owners Association chuan tukin zing dar 6 atanga tiam chin awm loin Mizoramin mamawh a lak luhna kawngpui Vairengte-ah kawng an dang dawn.
Kolasib district chhunga khaw hrang hranga 4-Lane-in a tihchhiat tur ram neitu inzawmkhawm pawl, Land Owners Association chuan Mizoram sorkar hnena zangnadawmna pek an phut nawnna pawhin awmzia a neih tak loh avangin kawngpui dan an tum ta a ni.
Land Owners Association chuan an harsatnate hi chin felsak turin tum eng emaw zat sorkar hotute an lo dawh tawh a, hemi chungchangah hian meeting pawh tum eng emaw zat koh ni tawh mah se, ram neitute hnena zangnadawmna sum sem phalna order hi revenue department bakah GAD-in tum hnih chhuah tawh mah se, tun thlengin an harsatna hi chin fel lohin a la awm mek niin an sawi.
Kawngpui dan an tum chungchangah Zoram mipuite harsatna siam zawnga hma lak an an duh loh laiin, loh theih lohna avang zawka hma la an nih thu sawiin, mipui hriatthiamna an ngen nghal.
Kawng dan dan tur tlangpui:
- Kawng dan tan hun, October 3, 2022 (Ningani) zing dar 6.
- Assam/State pawn atanga lirthei lo lut tur reng reng eng chi pawh dan tum a ni.
- Mizoram state chhung bik zin veivahna Maxicab, khualzin phur., etc., Mizoram chhunga lirthei che vel chu dan loh tur. Inter State Service ho erawh dan an ni ang.
- Mizoram atanga lirthei chhuak tur eng chi pawh dan loh tur a ni a, buaina leh harsatna siam loa chhuahtir tur.
- Harsatna bik thil – dam lohna/thihna etc., chu ngaihnathiam a ni ang.