Aizawl: Congress party-in Mizoram chhunga kuhva chungchanga harsatna thleng ching fel thuai turin MNF sorkar an phut.
Nimin khan thuchhuah siamin Congress party hian Mizoram khawthlang lama kuhva chingtuten kuhva tawlhruk a tam avanga an kuhva thar an hralh theih loh avanga harsatna thleng ta te, Mizo leh Mizo inkara inepna hial thleng te chu Mizoram sorkar chak loh vangte, ram hruaitu lu thenkhatte leh kuhva tawlhruknaa inhnamhnawih, Assam wanted ni mekte nen meuh pawha inzawmna tha an neihin a hrin chhuah niin an sawi.
MNF sorkar hian ram pawn atanga kuhva rah lak luh leh phurh kual hi dan hnuaia kalpui a nih theihnan hma a lak theih reng laiin, awmze neia hmalak tumna leh harsatna thleng pawh chin fel tumna a neih loh avangin Assam lamin an state chinah harsatna siamin, Mizoram thar chhuah ngei kuhvate pawh tawlhruk thila ngaiin an kaltlangtir phal loin, Mizoram chhung ngeia kuhva chingtuten harsatna tawkin an thlai thar kuhva chu an hralh thei ta lo a. Hengte avang hian kuhva phurtu motor neitute nen an inkarah inepna hial a thleng ta nia sawiin, “He thil hian MNF hi rorel zel tlak an ni lo a ni tih leh dan leh thupek kenkawhna kawnga an hlawhchham a ni tih a tichiang hle a ni,” an ti.
Congress party hian sorkar tha chuan a mipuite harsatna a chin felsak tur a nih laia mipuiin an harsatna ching fel tura hma an lak a ngai ta hi a vanduaithlak an tih thu an sawi a. Kuhva chungchanga Mizoram harsatna tawhte a rang thei ang bera ching fel turin Mizoram sorkar an phut thu leh Assam sorkar pawh Mizoram tual chhunga tharchhuah kuhva phurhna kawngah harsatna siam tawh lo turin an phut thu an sawi bawk.