Aizawl : Mizoram Pradesh Youth Congress Committee (MPYCC) President Dr. Lalmalsawma Nghaka chuan, thalai mahni inringtawk, mahni ke-a ding leh intodelh tir hi Congress party in a ngaih pawimawh leh tum ber pakhat a nih thu a sawi.
Thawhlehni zan khan Mizoram Pradesh Congress Committee (MPCC)-in Aizawl khawpui chhung Local Council tina Congress Unit te tlawhchhuah programme a duan anga Maubawk Veng Congress Joint Unit te tlawhin Congress Thalai President Dr Lalmalsawma Nghaka hian thu a sawi a. “Congress Party chuan thalaite tha tih chak a, an hmakhua tur ngaihtuahsak hi kan tum lian tak pakhat a ni,” a ti.
Congress kaihhruai sorkar kum 10 kalta chhung khan thalaite hmasawnna tur atan nasa takin hma an la tih sawiin Dr Lalmalsawma Nghaka hian, “Zirna, eizawnna kawng leh infiamna lamah hmasawnna ruhrel pawh thahnem tak kan din,” tiin, vawiina khawvel huap inelnaa Mizo thalaite an lan ve phak tak nachhan hi hmathlir thui tak nei chunga an hotute hmalakna rah a nih thu a sawi.
Dr Lalmalsawma Nghaka chuan, Mizo thalaite hi pi leh pute hun atang tawhin mahni intodelh leh mahni ke-a din tum tlat thinna rilru chu tunlai thangtharte zingah a lian thar niin a sawi a. A thlawna dawn leh sem lam aiin an thawh tur leh kawng kawhhmuh hi an duh zawk em em avangin Congress party chuan nakkum inthlanpuia an manifesto pakhatna ‘Tang puihna’ ah pawh thalaite hmakhua hi an tinzawn nghal niin a sawi a. |halaite hi ram innghahna lungphum an nih tlat avangin, Congress party-in sorkarna an chan leh chuan thalaite hmakhua tur hi tunhma aia nasa lehzualin buatsaih an tum tih a sawi bawk.
Maubawk Congress Joint Unit tlawhchhuah programme-ah hian Unit hruaitute leh Congress Local Council member-te an kalkhawm a, zawhna leh chhanna bakah hmalak dan turte an sawiho a ni.