Aizawl : Mamit district-a BJP hruaitu ten aspirational district an nihnaa hamṭhatna leh hmasawnna hnathawh leh sum hmanral a inmillo nasa niin an sawi a. Hnathawh sa central-a report dan leh hnathawh dan pawh a inmillo hle niin an sawi.
BJP, Mamit district hruaitute chuan Mamit press club-ah thuthar thehdarhtute kawmin heng thu te hi an sawi a. Central scheme monitoring & publicity chairman PC Lalengkima’n inkalpawhna a an hniam zia te, central scheme zingah hou- sing for all, UD&PA leh DRDO kaltlanga kalp- ui thin te chu central aṭangin a dawngtu tur te dawn tur pawisa pekchhuah vek ni tawh mahse, state sorkarin a nihna tur ang ni lovin a kalpui niin a sawi.
PC Lalengkima chuan “mirethei ten an in an ṭhiat a, khawrpum leh thei lovin a ṭhen chu a mawih chhe tawh” tiin, state sorkar chu miretheite in sakna tur sum chu kim taka a dawngtute hnen thlentir ngei turin an ngen tih a sawi a. Tui thianghlim a thlawna pek (Jal Jeevan) chungchang pawh sawiin, “connection a thlawna pek a ni lo, central sorkarin scheme a siam ang ngeia kalpui turin Mizoram sorkar an ngen tih a sawi.
Electrict connection pawh free connection turah metre box man an laksak nia an hriat thu pawh PC Lalengkima chuan sawiin, free gas connection-ah pawh a dawngtute hnenah agent lamain pawisa an laksak niin a sawi a. Heng scheme te hi a nihna ang taka kalpui tura sorkar an phut thu a sawi.
Street vendor te chungchangah pawh a nih tur ang a nih loh thu PC Lalengkima chuan a sawi a. Kum upa pension pawh Mizorama kalpui dan a diklo nia sawiin, “kum 60 chin chunglam chuan upate chawimawina a nih avangin an dawng vek thei, BPL nih kher a ngai lo” a ti.
Mamit district BJP hruaitute chuan pianphunga rualbanlo tan central sorkarin hamṭhatna a siam pawh a taka hman a ni lo niin an sawi a. Central scheme a nihna ang taka kalpui a nih theih nan theihtawp an chhuah zel tur thu an sawi bawk a ni.