Mizoram Volleyball Association chuan November 7 atanga 12 chhungin Pro Division club 12 te inelna GIG Motors Mizoram Volleyball Association Cup 2022 a buatsaih dawn.
MVA-in Pro Division enkawlin season kal mekah mipa team ruk leh hmeichhe team sarih a enkawl a, GIG Motors MVA Cup-ah Bungkawn hmeichhe team tih loh an tel vek dawn a ni.
Organising Committee Chairman Lalmawizuala Sailo chuan, “Tunhnaiah Mizoram hmun hrang hrangah volleyball an khel nasa a, huamzau zawk a hmasawnna a awm theih nan leh tihlar zel nan MVA Cup hmangin hma kan la a, Mizo player tha ber ber an inkhel dawn.”
“Tunlaia infiamna kawnga hriat hlawh tak Khawzawlah nghah a nih rualin Khawzawl District Volleyball Association nen kan phur tlang hle a, bialtu MLA Pu Tawnluia’n min phurpui bawk a, boruak pawh a lian sa viau tawh niin kan hria,” a ti.
Pro Volleyball League-a an thawhpui LPS Vision nen indawr tawhin an inrem a, ruahman anga thil a kal tluang a nih chuan Aizawl pawna tournament awm tawha Mizoram cable TV-in live telecast-a inkhel zawng zawng a pek hmasak ber a ni dawn tih MVA chuan an sawi a, hmasawnna bung thar pawimawh tak a nih tur thu an sawi bawk.
TNT, Chhinga Veng Spikers, Hunthar, Durtlang North, Tuichangral leh Tuipuiralin mipa champion nih an inchuh dawn a; Power Department Sporting Club, Durtlang, Armed Veng South, Luangmual, Kanan leh Bethlehem Vengthlangin hmeichhe title an inchuh ve thung ang.
Lawmman pawisa fai Rs 2,30,000 sem chhuah a nih dawn bakah MVA-in team tin insensona titlem turin Khawzawl an kalna leh hawna a tumsak dawn a ni.
Khawzawl Dinthar Court-ah khelh a ni dawn a, November 7 zanah MVA President Dr Lalmalsawma Nghaka’n tournament beng hawngin, November 12 zanah final an khel ang.