Aizawl: Mizoram kawngpuite a that zawk theih nana thawk dun mek, Central YMA leh Mizoram PWD ten nimin khan Cultural Centre, Bawngkawn South-ah an thawhhona thuthlung chungchang an sawiho.
MoU sawihona chawhma hun hi, PWD E-in-C Er. Bowman chuan kaihruaiin Central YMA President R. Lalngheta’n kalkhawmte lawmna hun a hmang a, Central YMA General Secretary Prof. Lalnuntluanga’n Central YMA leh Mizoram PWD ten thawhhona thuthlung (MoU) an ziah dan chungchâng report a pe.
Chawhnu hunah thawhhona chungchanga zawhna leh chhanna hun hman a ni.
Sub-Hqrs leh Group YMA hruaituten an huam chhunga inkalpawhna kawnga harsatna hrang hrang an tawh dante an sawi a. Hmalak mekna leh hmalak tum a nih leh nih lohte zawtin, Er. Bowman, E-in-C leh a huam chhunga thawktu SDO-ten an chhang a ni.
Central YMA leh Mizoram PWD hian June 14, 2018 atang khan thawhdunna hi an lo siam tawh a, thawhhona thuthlung angin Mizoram chhunga khaw hrang hrangte inkalpawhna tur kawng siam leh thawm that kawngah te, a siamtute tana harsatna awm thei sutkian dan tur kawngah te, kawng siam, vil kawngah te, kawng hrang hrangah an thawk ho thin.