Aizawl: ZPM Leader Lalduhoma chuan political party dinhmun sawiin, Congress chu dinchhuah leh beisei chi an nih rih loh thu leh MNF chu an hruaitu lu berin a tichhe vek tawh a, ICU-ah an awm mek tih a sawi.
Nimina Serlui constituency huam chhunga Saiphai khua tlawha vantlang inkhawmah thu a sawinaah Lalduhoma hian Congress party tan tun dinhmunah ram rawngbawl hi a har tawh tih sawiin, “India ram pum thlir pawhin Congress party tan dinchhuah leh hi beisei chi a ni rih lo a; chuvangin, ZPM-ah hian an theihna leh thiamnate hmanga ram rawngbawlpuiah kan sawm a ni,” a ti.
MNF party chungchang sawi bawkin Lalduhoma hian, “MNF party hian Krismas vawi khat bak an nei tawh lo tih a hriat a. Tunlai thil awmzia ngun taka thlir chuan mipui hian kan ram roreltuah hian kan pawm tawh lo tih a lang a ni; engvang nge kan tih chuan a hruaitu lu ber hian a tichhe vek tawh a, ICU-ah an awm mek a ni. Tuna kan chief minister kutah hian kan ram budget hi mipuiten kan dah ngam tawh lo a ni,” a ti bawk.
Lalduhoma hian an party, ZPM chungchang sawi bawkin, ZPM hi party naupang tê niin, kum 2018-ah party pawh an la ni lo a, |angrual Pawl angin inthlan an hmachhawn a. Chuti chung chuan Mizoram Assembly House-ah eptu party lian ber an ni tih sawiin, “Kum 2018 hmu lama inthlan kan hmachhawn reng rengah pakhatna kan nih loh pawhin pahnihna kan ni chho ta char char a. Tunah hian Mizorama political party-ah chuan a insawhnghet ber kan lo ni ta a ni,” tiin, ni tinin mi tharin an rawn zawm zel a, Pathian leh mipuite zarah sorkarna an chan ngei pawh a rin thu a sawi.
Nakkum MLA inthlanpuiah sorkarna an chang a nih chuan hmasawnna ruhrel an ngai pawimawh dawn a, chung zinga pakhat chu power a intodelh a nih thu te, inkalpawhna kawng tha ramin a neih theihna tura hmalak te, kuthnathawktute chawikan te, eizawnna bultanna tur atan hand holding policy tha tak an neih thu leh thalai lehkhathiam enterpreneur lama tui tan hmachhawp tam tak an neih thu leh awlsam zawka loan an puk dan turte an siam dawn niin a sawi bawk.