Health & Family Welfare Minister Dr. R. Lalthangliana’n nimin khan hmarchhak huap Medical Microbiology (Parasitology) mi thiamte intawhkhawmna, Tropical Diseases of Parasites Conference, TROPACON NE 2022 chu Art & Culture Auditorium, Berawtlangah a hawng.
Conference hi Department of Microbiology, Zoram Medical College leh Indian Academy of Tropical Parasitology (IAPT) North East Chapter tangkawpte buatsaih niin thupuiah ‘Emerging & Re-emerging Tropical Parasitic Diseases’ hman ni.
Thu sawiin Dr R Lalthangliana chuan Mizoramin microbiologist leh parasitologist mi thiamte intawhkhawnna a thleng chu mi thiam microbiologist mai bakah Mizoram pawhin hriselna tha a neihna kawngah a hlawkpui ngei a beisei thu a sawi.
Natna hrik hrang hrang natna thlen thei chungchang zirna microbiology leh chumi hnuaia peng, parasitology chu medical field-ah a pawimawh viau tih sawiin Dr R Lalthangliana hian, heng subject-te hi non-clinical speciality nih mah se, clinical speciality-te tan, engin nge natna a thlen tih an hriat hma chuan damdawi a chawh mai theih loh avangin an pawimawhna a sang viau niin a sawi.
Covid-19 hripui thawh khatna lai khan Mizoramin Covid-19 test a neih loh laia Mizorama microbiology lama mi thiam leh mi thiam dangte – College of Veterinary Sciences, Selesih, MZU, PUC leh RIPANS-a mite chuan RTPCR Laboratory dinna kawnga sorkar ruahman siampuiin, hun reilo tea RTPCR Lab a nei a, anni hian Mizoram tan an thawh hlawk hle a, an thiamna kha sorkar leh mipuiin an chhawr tangkai hle tih a sawi bawk.
Conference-ah hian ram chhung leh hmarchhakah atangin natna thlentu natna hrik zirbing mi thiam microbiologist lar takte telin an zirbingnaa thil an zir mek leh an hmuhchhuah chungchangah presentation neiin, sawihona hun an hmang a. Hmarchhak medical college hrang hrang bakah MZU, ZMC, CVSc atangin mi thiam 53 an tel a ni.