Rural Development Minister Lalruatkima chuan MGNREGA kalpuina tur atan sorkar laipuiin sum a pek atangin ni 10 leh ni 85 inhlawhna a awm tawh thu a sawi.
MGNREGS hnuaia State Employment Guarantee Council chu an Chairman Lalruatkima, RD Minister hoin nimin khan Secretariat Conference Hall, MINECO-ah an thukhawm. He thutkhawmah hian Minister Lalruatkima hian, Mizoram sorkarin MGNREGA hlawhtlin zel nan nasa takin hma a la zel a, ni 100 inhlawhna hi thingtlang lonei mite chhawmdawltu a nih bakah leh hmun hrang hrang a ram leilung humhim leh tuihna humhalh bakah tui lakna siam nana hmanrua tha tak a nih thu a sawi.
Lalruatkima hian, MGNREGA kalpui na tur atana central sorkarin sum a pek atangin ni 80 atanga ni 85 inhlawhna a awm tawh thu sawiin, central sorkar chuan sum hman zawh anih hunah a bak thawhna tur a la rawn pek leh a rin thu a sawi bawk.
Thutkhawmna-ah hian MGNREGA Mizorama kalpui anih dan te, harsatna leh hmachhawp bakah hmasawn dan te thlirho a ni a, chung zingah chuan Draft Mizoram MGNREGA Personnel (Recruitment and Condition of Contract Guidelines, MGNREGS Employtee te one-time increment chungchangte, vantlang/khawtlangin an chhawr tangkai tur community assets siam nana material component inhman tawm dan kalpui mek te thlirho leh sawiho a ni.
MGREGA hnuaiah hian Job Card nei zat hi 2,13,348 a ni a, active job cards hi za zelah 99.53% a ni a. Geo-MGNREGA (Bhuvan), hnathawh zawh atanga asset geo-tagged hi 96.82% a ni a, Mizoram chu India ram a geo-tagging ti tha ber a ni.
MIS atan hian SECURE Soft hman a ni a, Direct Benefit Transfer atana Aadhaar seeding hi 98.58% niin, Mizoram chu bank account leh aadhaar intlunzawm tha pawl state niin, 100-ah 100 a nih theih nan Project Director ten an bial tin-ah hma an la mek bawk a ni.
April 24, 2022 atangin Prime Minister-in a hawn, Mission Amrit Sarovar chu MGREGA nen inthlun zawmin, he mission hnuaiah hian 62.5% thawh a ni tawh bawk a ni a, district hrang hrangah rainwater harvesting, tuihna humhalh leh tuilakna tur te siam a ni bawk.