Aizawl : BJP Mizoram Thalai chuan MNF party chu sorkar zel tlaka an ngaih loh thu leh chief minister ni tlakah Zoramthanga an ngaih tawh loh thu an sawi.
An thuchhuahah Zoramthanga kaihhruai MNF sorkar chu kawng engkimah a hlawhchhamah puhin, inthlan dawna an party manifesto pui ber, mipuiin an thlan chhan SEDP Rs 3,00,000 chu in tinah NLUP dawng tawhte pawhin dawng vek tura an intiamna chu dawt-ah a chan tirin, an insawi anga an sem leh theih loh avangin hmai phih nan Rs 25,000 mi tlemte hnenah chauh an sem ta mai hi MNF sorkar rintlak loh zia a lang chiangin, Zoramthanga hi chief minister ni tlakah an ngaih tawh loh thu an tar lang.
Mizoram BJP Thalai hian, sorkar hnathawk te’n thla tih hlawh an lak hun pawh hun eng emaw chen atang khan an tidanglam zo ta mai hi sorkar hlawhchhamzia leh Finance changtu chieg minister hlawhchham zia tilang chiangtu a nih thu sawiin, “Mizoram sorkarin a hnathawk te a enkawl zo ta meuh lo chu zahna chang hria a, Finance changtu chief minister hian sum a enkawl thiam ngang lo anih chuan midang kutah a dah dawn nge, banna a theh lut mai dawn tih hi kan zawhna a ni,” tiin, kawng tam takah hlawmchhamna hlir maia Mizoram hruaitu MNF sorkar chu sorkar zel tlakah an ngaih loh thu an sawi.