Meghalaya chuan Mukroh, West Jaintia Hills district-a Assam nena an inrinaah inkahna thlenga Assam forest department hna thawk pakhat tela mi paruk an thih hnuah district pasarihah mobile internet service chu darkar 48 chhung atan a tithi.
Mobile internet/data service hi Thawhlehni chawhma dar 10:30 atang khan tihtawp tan a ni tih Meghalaya-a Home (Police) Department chuan an sawi.
Meghalaya Chief Minister Conrad Sangma chuan inkahna thlengah hian mi paruk an thih thu leh an zinga pakhat hi Assam Forest Guard a ni a, mi dang panga erawh an state mi an ni tih a sawi.
“Hliam tuar chu rang taka damdawi in panpui an ni a, enkawl mek an ni a. Meghalaya Police-in FIR an ziak lut tawh,” tiin chief minister chuan a sawi.
Hetih lai hian Meghalaya sorkarin Thawhlehnia hriattirna a tihchhuahah, “Meghalaya, Shillong-a police headquarters atanga thu dawn chuan inkahna hi Mukroh, West Jaintia Hills, Jowai-ah a thleng a, vantlang himna tihderthawn niin West Jaintia Hills, East Jaintia Hills, East Khasi Hills, Ri-Bhoi, Eastern West Khasi Hills, West Khasi Hills leh South West Khasi Hills-ah mipui himna tura thil kalpui a ni,” an ti.
Media (WhatsApp leh social media – Facebook Twitter, YouTube etc) hman dik lohna a thlena muanna awm mek a tihbuai hlauh avangin dan leh thupek kenkawhna tihkhauh a nih thu CVD Diengdoh, Secretary to the Home (Police) Department, Meghalaya chuan hriattirna a chhuah.
Telecom leh social media service chu West Jaintia Hills, East Jaintia Hills, East Khasi Hills, Ri-Bhoi, Eastern West Khasi Hills, West Khasi Hills leh South West Khasi Hills district-ah te tihthih a ni.
Hriattirnaah hian dan bawhchhia chu Indian Penal Code (IPC) Section 188 leh Indian Telegraph Act, 1885 hmanga hrem an ni ang tih tar lan a ni bawk.
Inkahna thlen chhan hi hriat mai a la ni lo.
Meghalaya leh Assam hi ramria intihthiam lohna nei sa an ni a, Assam-a Jimanta Biswa Sarma kaihhruai sorkar a din hnuah inbiain chin fel dan pawh dap niin an inrem lohna hmun hrang hrangte chu a tahtawla tihfel tumin hma an la a, thui tak an thleng tawh nghe nghe.