Aizawl : Khumtung khelmual thar leh Darlawng MHIP Run, MLA fund hmanga siam leh sak bakah khemual thar lawmna atana Ramlai zone football championship buatsaih te chu nimin khan bialtu MLA, Dy. Speaker ni bawk Er. Lalrinawma’n a hawng.
Bialtu MLA chuan Khumtung khawtlang mipuite inpekna avanga khelmual tha tak hawng thei an nih thu leh khawtlang mipuite a lawmpui thu sawiin, tangkai taka hmangzui turin duhsakna a hlan a. A enkawl zui kawngah pawh mipuite tangrual turin a chah.
Er. Lalrinawma chuan infiammite chu tualchhung inelna ringawta duhtawk lova, hmundang ramdangah inelna sang zawka tel thei khawpa rilru leh taksa lama inbuatsaih turin a chah a. Football chu Mizo thalaite thiam chi infiamna, thalai tam tak ten sum tam tak hlawha ei an zawn mekna a nih thu sawiin, “Khumtung thalaite pawhin chu chu kan thleng ve thei a ni”, a ti.
Infiamna hrang hrang tuipui rualin nitin nunphung lam pawh uluk a tul thu Er Lalrinawma chuan sawiin, thawhrimna leh Pathian rawn chung zela kal chuan hlawhtlinna a hnai bik tih a sawi bawk.
Darlawng MHIP Run a hawnnaah bialtu MLA chuan Mizo nuna hmeichhiate mawhphurhna leh an dinhmun pawimawhzia sawiin, chhungkua, ram leh khawtlang tana Mizoram puma MHIP te hmalak thinna fakawm a tih thu a sawi bawk a ni.