China chuan hripui laka himna atan inkhuahkhirhna khauh tak an kalpui mek laiin a len hnua ni khata Covid kai hmuh an tam ber ni an tawng thar.
Khawpui ber, Beijing leh chhim lama sumdawnna khawpui, Guangzhou leh khawpui dang tam takah hri hi a darh thar mek.
Nilaini khan mi 31,527-in an kai tih hmuh chhuah niin April thlaa a vanglai khan mi 28,000 an lo tling tawh a, an khum hneh hle.
Mihring tluklehdingawn 1.4 chuang chennaah chuan a tam lutuk lo va, sorkarin a chhinchhiahnaah chuan thihpui pawh mi 5,200 vel chauh an la tling.
China-ah hian mi maktaduai zela pathum chauhvin Covid la thihpui zel ang chauh a ni a, US-ah erawh chuan mi 3,000 zel thi ang leh UK-ah pawh mi 2,400 zel thi ang an ni a. Hetih rual hian hetianga chhut ringawt hi thil dik erawh a ni lo tih mi thiamte chuan an sawi.
China-in zero-Covid policy an kalpui erawh chuan nunna tam tak an chhan nia ngaih a ni a, hetih rual hian an ram eibar dinhmun erawhin a tuar a, mi naran nunphung a buai phah nasa.
Chawlhkar tam vak lo liam taah khan an inkhuahkhirhna eng emaw zat erawh an thlahdul then tawh.
Hri kaiin a hnimhnaihte inkhung hran hun chhung chu sorkar hmunah ni sarihah titawiin mahni inah ni thumah a titawi bawk a, secondary contact an chhui chiam thin pawh an tawpsan tawh a, hei hian inkhung hran ngai a titlem sawt.
Thuneitute chuan kumin kumtir lamah khan an khawpui lian ber, Shanghai chu kharkhip hmak theih dinhmunah ding mah se kharkhip lo turin an lo ti tawh bawk.
Hetih lai hian Beijing-ah hri darh thar lehin thla eng emaw zat hnuah hri vanga thi an awm thar leh bawk a, thuneitute chuan district enge maw zatah inkhuahkhirhna tikhauh thar lehin dawr, sikul leh thingpui dawr te an khar leh tawh.
Ram laili, Zhengzhou khawpuiah pawh mi maktaduai ruk zet chu Zirtawpni atang hian kharkhip a ni dawn tih thuneituten an puang tawh bawk.
Zhengzhou-ah hian iPhone siamtu company lian ber, Foxconn-a thawktuten an industrial complex chhungah lungawi lohna lian tak an lo lantir tawh a. A hnuah firm chuan hlawh inpekna lamah ‘technical error’ a awm thu an sawi a, hriatthiamna an dil zui.
China hian an ram atanga Covid hnawh bo vek an tumna kawnga an kalphung hi an eibar zawnna leh dinhmunin a tuar hle a. Mass testing leh inkharkhipna khauh tak tak an kalpui a, heti chung hian province 31-ah hri kai an la awm.
Hri kai an pun zel chhan lian tak hi ram changkang dangte nena khaikhinin invenna la an la tlem vang a ni a, an rama kum 80 chung lam zahve chauhvin invenna hi an la la a ni.
Invenna atan hian ram dang siam an la lut duh lo va, anmahni siam chu a rintlak tawk tih finfiahna chiang tak awm lo chungin an hmang.
President Xi Jinping chuan inkhuahkhirhna khauh tak kalpui hi an rama kum upate humna tha a nih avanga ti an nih thu a sawi.
Zero-Covid hi a rorel dan kalhmang leh a thuneihna lantirna anga ngaih a ni a, mi tam takin mi pakhat rorelna ram a nihzia lantirna mai niin an ngaihsak.