Vairengte-a kuhva kudam pakhatah, Myanmar atanga lak phai lama hralh tur nia hriat Burma teak cubic 200 leh opium chi (seed) bag 100 man a ni.
An thudawn bawhzuiin Kolasib DFO Margaret Lalramchhani leh a hoten Nialini zan khan Vairengte daia Lalthlamuani kuhva kudam kawtah dan loa lak luh Burma teak hi an man a, hemi rual hian kudam chhungah hian opium seed thahnem tak hmuhchhuah ni bawkin, opium seeds leh a neitu nia inchhal, Lalbiaktluanga, Lunglei, tuna New Champhaia cheng mek bakah a phurhna lithei hi Vairengte Police SDPO Lunghnema leh a hoten an man nghal bawk.
Thingzai leh opium seeds neitu nia inchhal sawi danin Myanmar atanga a lei niin, Melbuk atangin truck lian chi, MZ 01J/7886 hmangin Vairengte a thlenpui a, kawng lakah an paltlang checkgate thenkhatah pawisa a pek thu a sawi.
Thudawn danin Vairengte-a a dahna kudamah hian dah man chawiin heta tang hian hnam dang sumdawngte hnenah hralh chhawn tur nia hriat a ni a, a leitu tur erawh biak lawk a nei lo niin a neitu hian a sawi.