Switzerland striker Breel Embolo chuan Cameroon nena an inkhel a goal awmchhun a khung a. World Cup Group G inkhelah 1-0 in Switzerland an chak.
Embolo hian a pianna ram laka a goal khung hi a lawm duh lova. Inkhel hautak leh team pahnihte inbeih tawk viaunaah Swiss lam a lawm zawkah an tang.
Al Janoub Stadium-ah ‘Indomitable Lions’ an vanduai a. An tlan taima in an football khelh a huaisen.
Brazil la hmachhawn ve ve tur an nih avangin chak a pawimawh tih hria in an inkhel.
Switzerland zawk first half-ah erawh goal chhuah hmasa zawk nih an hnaih thin a. Cameroon tan Eric Choupo-Moting, Bryan Mbeumo leh Martin Hongla ten huntha an hloh vek.
Second half tan hnu lawkah Switzerland in team goal mawi an khung a. Embolo chu a hmawr bawktu niin ram tana a goal 12-na chiah a ni.
Hmahruaitu an nih hnuah Switzerland in goal khung belhna hun an nei a. Ruben Vargas khung tur chu Andre Onana chuan a dansak a. Embolo leh substitute Haris Seferovic te pawhin remchang an neih an khung lo.
Cameroon hi World Cup finals-ah a zawna vawi 8 an tlawmna a ni.
Switzerland coach Murat Yakin chuan, “Inkhel tan hma khan Breel hnenah khelmual pawnah i thiante an ni a, a chhungah chuan i khingpuite an ni tiin ka hrilh. Football-ah chuan hetiang thawnthu ngaihnawm hi a awm ve thin. Mahse a tih tur a ti thlap.” tiin a sawi.
Cameroon boss Rigobert Song chuan inkhela danglamna siamtu Embolo chu an ram tana khel tura a awh thu a sawi a. Mahse a inkhelh danah a chhuang hle tiin a fak bawk.
“A ram ang pawhin kan mi in goal a khung hi kan lawm hle. Football-ah chuan tiang hi a thleng ve thei a, mimal takin ka chhuang hle.” a ti.