India-a political party hlun ber leh eptu lian ber ni mek, Indian National Congress hruaitu, Rahul Gandhi chuan km 2,000 chuang kea ‘inpumkhatna kawng zawh’ a kalpui mek chuan a kawng chanve chuang a thleng tawh a, he thil hian an party chu tinung tharin Prime Minister Narendro Modi-a hova BJP sorkar mek a phet thlu zo dawn em tih ngaihchan mek a ni.
Gandhi-a’n Bharat Jodo Yatra a kalpui mek hi thla nga awh tur niin chhim tawp, Kanyakumari, Tamil Nadu atanga tanin February-ah Jammu & Kashmir khawpui, Srinagar-ah a tawp khar a ni ang.
Gandhi-a hi a thlen chinah chuan party worker, mihring dikna chanvo humhalhtu leh mi dang tam takin an lo lawm thin.
“Kan bei zel ang a, rorel lai BJP hi kan tite zel ang,” tiin a sawi.
Congress hian tunah hian India-a state 28 zinga pahnihah chauh sorkarna an chang phak tawh a, an len vanglai ngaihtuah chuan tê tawh tak an ni.
BJP chuan Gandhi-a thil kalpui mek hi ‘ram keh darh miah lo zawm khawm tumna’ tiin an sawi a; mahse, ni 75 chhung kawng a zawh tawhnaah hian Bollywood lemchan thiam, mi thiam, activist leh BJP eptu dang party hruaitute pawhin tawiawmin an thlawpna an lantir hlawm.
Hyderabad-a management consultant pakhat, kum 2014 inthlanpuia Prime Minister Modi-a leh BJP vote-tu pawhin Gandhi-a kawng zawh hi zuiin tuna sorkar mekte chu ‘hmathlir nei lo’ tiin a sawi.
Pune-a ice-cream parlour neitu nupa pawhin an dawr hmaah India-a university-te BJP sorkarin politics khelh nana an hmang an duh lohzia lantirna tarin Gandhi-a hi an lo hmuak a. Thingtlang khaw mi tam tak pawhin sorkarin an khawsak changkanna tur engmah a thlensak lo tiin sorkar laka lungawi lohna lantir chungin Gandhi-a hi an lo lawm bawk.
Gandhi-a zuitu zinga mi, Mahatma Gandhi tupa, Tushar Gandhi chuan, “He thil hian India-in a zalenna, a hlutna leh a theihna a hloh tawh a tihnun thar leh beisei vangin ka tel ve,” a ti.
BJP lamtang chanchinbu lian tak takten Gandhi-a kawng zawh hi ngaihven tam lo mah se state panga a thlen tawhah chuan a thawm a lian viau zel.
Hetih lai hian miin a thlen china an lawm viau lai hian a tak takah BJP lak atangin mi a hip em tih chu zawhna a ni mek.
Grand old party hi tun hnai kum eng emaw zat chhung chu inthlan apiang deuhthawah a chak lo lam zelah an tang a, Gandhi-a kawng zawh hian voter-te an lamah a hip leh zo dawn em tih chu mi thiamte zawhna a ni a. Amah Gandhi-a ngei pawh mi tam takin politics khel thiam lo leh zei lo nia an sawina lak atangin a fihlim phah thei dawn em tih chu zawhna a ni bawk.
“Ram bial khat roreltu mai a ni lo va, amah eltute sawi dan mai a ni,” tiin zirlai pawl hruaitu thin, tuna Congress member ni ta, Kanhaiya Kumar chuan Gandhi chungchang hi a sawi a. Kumar-a hi tuna kawng zawh mekah hian thu a sawi thiam avanga hriat hlawh thar lehzual a ni bawk a. Gandhi-a kawng zawh hian a bulthum atangin mi a bei niin a sawi bawk.
Congress chuan Bharat Jodo Yatra hi inthlan thlira an tih a nih loh thu an sawi a; mahse, Kumar chuan an tih chhan lian tak pakhat chu ‘voter-te nena inzawmna dinthar lehna tur’ a nih thu a sawi thung a. Hei vang hi a ni ang Gandhi-a pawhin thu a sawina reng rengah BJP kaihhruai sorkar chu eibar, khawsakna man sang, hna nei lo tam leh lo neitu intihlum tam lutuk thilah a bei nasa thei hle.
An party inrelbawlnaa a hniam ber (grassroots level)-a party worker-te nena thawhhona tha neih thar leh chu Congress-in he kawng zawha an tum lian ber a nih thu an hruaitu hlun, Jairam Ramesh chuan a sawi bawk.