Gandhi-a hian kawng zawh a tan hnuah a larna a belhchhah thar nasa hle a. Polling agency C-Voter-in a thlen tawh chin state-a ngaihdan an lakah chuan a hmaa mipuitea a tlak nat dan chu tunah chuan 3-9% velin a sang hlawm tawh tih an tar lang.
Hetih rual hian hetia a lar tharna hian kum 2024-a India inthlanpui lo awm turah Modi-a khing phak tak takah a siam dawn em tih a lantir kher lo tih an tar lang bawk.
C-Voter dintu, Director Yashwant Deshmukh chuan kawng zawh hian ‘India chhim lamah Gandhi-a an lo ngaihdan chu a siam tha nasa’ tiin a sawi a. Hetih rual hian chhim lam state-te hi engtik lai maha BJP vulna a ni ngai lo tih a sawi a. “Mahse, a lakna hi vote-ah chantir theih a nih chuan thil dang daih a thleng thei,” a ti.
“India hmar lam bial, ‘Hindi heartland’ an tih, BJP an tlak natna hmun a thlenah amah an lo lawm dan pawh a dang daih thei,” a ti bawk.
Politics-a mi thiamte chuan inthlan hmabak hnai tak, Gujarat leh Himachal Pradesh-ah kawng zawh hian nghawng a nei phak dawn em tih an ngaichang mek bawk.
Congress thupuangtu thin, an party a sawisel avanga kum 2020-a chawlhtir tak, Sanjay Jha chuan Congress-in Gandhi-a kawng zawh an chhawr leh chhawr loh chu a tum ram a thlen hun hnu lamah a chiang dawn chauh niin a sawi.
Jha chuan Congress-in tuna an mamawh ber chu an pawl chhunga buaina neuh neih awm mek – phur lohna awm te, inbeihna leh induhsakna bik awm te tihbo leh BJP khum tura ngaihdan fumfe leh mumal tak neih a nih zawk rih thu a sawi.
Party hian an hruaitu lawk tak tak chhuak awm leh thin leh BJP-a pakai leh thin an awm chu an tihtawp thuai leh ‘inthlan chhawn thuneihna’ tihbova Gandhi chhungkua ringawt hmatheh chu tihbo a ngai niin Jha chuan a sawi bawk.
Thla hmasa khan Congress hian kum 24 hnua a hmasa ber atan Gandhi hming pu lo president thar an nei a. Mallikarjun Kharge-a hi Gandhi chhungkaw hnungzuitu rinrawm tho a ni thung.
Gandhi chhungkua duhkhawp tawh lohna sawi a nih mek lai hian BJP chuan remchang chuhin Gandhi-a chu ama party ngei pawh pumkhata siam zo lo chungin engtin nge pumkhatah India a siam theih ang tih an zawt a. An party chhungah pawh mipui rorelna a awm laiin engvangin nge ram pum huapa a thlentir theih dan tur an zawt bawk.
Political pundit-te chuan kawng zawh hi eptuten tun hmaa an tih fo tawh niin an sawi a. Kawng zawh hi dawi thiltihtheihna (magic wand) ang a nih loh thu an sawi rualin Congress tluchhe mek tan erawh intun din lehna a nih theih thu an sawi.