Kum li liam taa Australian hmar lama nula thah thubuaiah India pa pakhat chu India-ah man a ni.
Kum 24 mi, Toyah Cordingley-i hi Octoberm 2018 khan nasa taka sawisakna hnuhma nen chhar a ni.
Tun thla tirah khan Queensland sorkar chuan a titu hrilh thei hnenah A $ maktaduai 1 zet pek a tiam thu a puang.
Toyah-i thattu ni ngeia hriat, Rajwinder Singh-a chu man a ni zui ta a ni.
Queensland police chuan Delhi-ah Indian officer-ten Singh-a hi Zirtawpni khan an man a, an rama a chungthu rel turin lak luh tuma court-a an buaipui zui tur thu an sawi.
Queensland Police Commissioner Katarina Carroll chuan ni rei tak hnuah an nghah chu a lo thleng ta tih a sawi a. “Court-ah thubuai rip tak kan pharh ngei ang tih ka chiang,” a ti.
Singh-a hi nurse a ni a, Toyah-i ruang an chhar hnu darkar reilo teah a nupui leh a fate pathum nen Australia an chhuahsan a. Sydney-a international airport-a a thlalak pawh hmuh a ni.
Detective-te chuan Toyah-i hi khualzinte tlawh tam tak, Cairns leh Port Douglas inkara Wangetti Beach-ah October 21, 2018 khan a ui nen an leng chhuak a haw lo va. A ruang hi a tukah a pain a taksa chanve vuta khuhin a hmu chhuak a ni.
Tun thla tir khan Australian thuneitute chuan Singh-a man a nih theih nana pui turin vantlang an sawm.
Buttar Kalan, Punjab-a piang, Singh-a hi tualthahna thlen lai hian ruang chharna hmun atanga darkar hnih vela thlen theih, Innisfail-ah a cheng thin.
Commissioner Carroll-i chuan Punjab-a a tlanchhiat hnuah hian man theih lohvin a bibo char char tih a sawi.
Australian sorkar chuan March, 2021 khan an rama lak an dil a, Indian thuneitute pawhin phal mah se amah ber hi man theih a ni lo.
Man tuma thawk chhuak Queensland police chu tun hnai lawk khan India atangin an haw a, Australian chanchinbuten an tar lan dan chuan Queensland police officer panga, Hindi leh Punjabi thiamte hian WhatsApp kaltlanga thu dawngin Singh-a pawh Indian police-ten an lo man theih phah ta a ni.
A luman an chhiar hlim khan Toyah-i pa, Troy Cordingley chuan a fanu naupang tak chuan nun leh khawvel a chen ve thei ta lovin a lak atanga lak bo a nih thu a sawi.
“A titu man leh hrem pawhin Toyah-i kha a ko kir tawh dawn lo va, dikna hlen chhuah erawh a phu a ni,” a ti.
Toyah-i thahtu luman chhiar hi Queensland-ah chuan a sang ber a ni nghe nghe.
Carroll-i chuan Indian police-in an thawhpuinaah lawm thu a sawi a, an thawhhona a tha tak zet tiha sawi.
Queensland Police Minister Mark Ryan chuan Singh-a man a ni chu rei tak an nghah lo trhleng ta a nih thu a sawi.